Opinion: Supervision parlamentario efectivo?!

Opinion: Supervision parlamentario efectivo?!

Posted on 10/30/2017 9:41 am AST | Updated on 10/30/2017 9:02 pm AST

Dia 27 di october 2017 e di dies inicio di Parlamento a tuma luga cu bastante tamtam. Tawatin cantidad di bon intension y promesa. A pone hopi emfasis riba e interes di pais y su ciudadanonan. E pregunta ta, si e biaha aki como excepcion no ta trata di storia atrobe?

Manera di custumber den politica ‘tradicional’, e ofishi di parlamentario no ta esun principal. Asina POR ya caba a dispensa su dos ‘votegetternan’ principal pa nan tarea di parlamentario, tumando na cuenta cu di tur manera nan lo haya un puesto di ministro. Pasobra ta esey ta e meta. Solamente como ministro por logra algo den nos ‘estado di derecho’, por haci y deshaci y por haci ‘negoshi’. Parlamento ta sirbi solamente como decoracion pa aparenta e ilusion di un estado di derecho y pa legalisa disparate di gobierno. Como recompensa, parlamentario por biaha durante e aña cu participacion na Par(anda)Latino como climax.

Aparentemente lo dura un tempo mas prome cu esnan prome riba lista y e votegetternan principal lo realisa nan mes cu en realidad nan luga ta den Parlamento. Di mes e excepcion riba esaki ta lider di e partido di gobernacion mas grandi cu ta bira prome ministro como identificacion di e maneho. Sinembargo, e lucha ferviente pa puesto di ministro cu casi tur otro ‘candidato di preferencia’ ta hiba, ta duna e impresion fuerte cu e bentahanan tradicional di e funcion di ministro manera dunamento di privilegio como recompensa di e sosten cu a ricibi y ‘e negoshi’ ta sigui hunga un rol predominante.

Ya caba pa algun decada e debilidad y disfuncionamento di Parlamento di Aruba ta forma un fuente di preocupacion. Segun Constitucion e tin cinco tarea importante.

Na prome luga e mester defende nos Constitucion y bienestar di Aruba lo miho posibel. Pero si lesa raport di specialmente Conseho di Consulta (CC) y Controlaria General (CG), ta bira cla cu Parlamento a faya structuralmente pa cu e puntonan aki. Asina el a permiti Gobierno (casi) tur aña atrobe pa entrega presupuesto (algun biaha hopi) lat. Ademas ela acepta sin problema e falta di realismo y e cantidad di omision, y el a legalisa tur fayo dunando su aprobacion ciegamente. Di e manera ey Parlamento mes a debilita su funcionamento. Tambe e maneho di nombracion discriminatorio di personal basa riba color politico y cu consecuencia financiero serio no a causa ningun disturbio den Parlamento.

Na di dos luga Parlamento mester husga presupuesto, entre otro a base di e consehonan di CC. Pero a pesar cu a discuti presupuesto tur aña den Parlamento, a neglisha conseho, advertencia y recomendacion di CC sistematicamente. P'esey a resulta cu a ripiti esakinan durante decada y cu a aproba presupuesto irealista cu un cantidad di fayo legal y tecnico sin ningun problema.

Tur aña tambe Parlamento mester huzga e cuento anual cu ta duna cuenta di e entrada- y gastonan di nos pais. Cu e cuenta anual aki den man mester evalua e ultimo presupuesto y por haci adaptashon pa e siguiente presupuesto. Pero...desde Status Aparte Parlamento nunca a ricibi ni a exigi un solo cuenta anual aproba pa accountant. Consecuentemente nunca (!) por a huzga calidad di e administrashon financiero di Aruba. Di mes no por a probecha di un ‘efecto instructivo’ pa probecho di e siguiente presupuesto.

Finalmente Parlamento pa ley mester elabora e administrashon financiero mas aleu den ley di ordenansa pa por ehecuta su tarea di control na un manera responsabel. Ademas e mester fiha regla pa garantisa e legalidad di e gobernacion, garantisando calidad di gobernacion. Pero aki tambe ta discuti durante decada (!) riba e mehoracion necesario di Ley di Comptabilidad. Te ey ta keda! Y no a haci nada na ponemento di regla pa garantisa legalidad di gobernacion, garantisando bon gobernacion.

Riba dje e cantidad y/of calidad di participacion di parlamentario na e diferente comisionnan di trabou aparentemente ta insuficiente. Di otro banda nan ta sobresali den reforsa e polarisacion entre e partidonan y consecuentemente den comunidad. Esey ta haci cla cu interes di partido ta hopi mas importante cu interes di comunidad. Consecuentemente e pregunta ta, ki balor agrega nos Parlamento tin pa nos estado di derecho democratico.

En realidad Parlamento ta e schakel di mas importante den henter e cadena di ‘checks & balances’. Entre otro a base di e conseho-, advertencia- y recomendashonnan di parti di e instancianan denomina pa ley, Parlamento ta huzga calidad, legalidad y efectividad di e maneho di gobierno. E ultimo 30 añanan, ela faya barbaramente di haci tal. Den practica, Parlamento tawata e schakel di mas debil. Como consecuencia, e cadena di ‘checks & balances’ no a funciona debidamente, cu resultado devastador. Un causa di esaki tawata entre otro e cultura di silencio di comunidad cu no a hala atencion di su representantenan. P'esey tambe por spera un mehoracion den funcionamento di Parlamento solamente si pueblo sigui e trabou di gobierno na un manera critico y ta exigi accion corectivo di parti di su represetantenan. Esey ta nifica pues cu pueblo ta haya e Parlamento tambe cu e ta merece!  

Scirbi pa Armand Hessels. 

  • Opinion: Un yamada urgente na AVB encuanto futbol femenino na Aruba

    Opinion: Un yamada urgente na AVB encuanto futbol femenino na Aruba

    Futbol femenino na peliger!: Cu nan accionnan Arubaanse Voetbal Bond (AVB) lo hiba futbol femenino na Aruba den decadencia!

  • Opinion: BERMUDEZ, SCHWENGLE Y PAUL CROES TA HUMIYA PARTIDO AVP Y NAN VOTADORNAN Y MESCOS CU PUEBLO DI ARUBA

    Opinion: BERMUDEZ, SCHWENGLE Y PAUL CROES TA HUMIYA PARTIDO AVP Y NAN VOTADORNAN Y MESCOS CU PUEBLO DI ARUBA

    E siman aki nos por a mira con arogancia den politica aki na Aruba parce di no tin limite. Nos por a tuma nota e.o. di un entrevista realisa pa NoticiaCla cu dos minister di e actual gobierno cu e proposito pa sa si nan lo continua den politica y e motibo dicon nan e escoge pa sigui. Tambe nos por a mira e actitud di un minister cu ta sinta na cas ta cobra, ta bin cuestiona e investigacionnan rond su persona y cu ta trata di algo politico aki.

  • Academico, Experto, e microfono ta dibo!

    Academico, Experto, e microfono ta dibo!
  • Opinion: 'Een schuld op steroids, en … wat je niet verteld wordt !'

    Opinion: 'Een schuld op steroids, en … wat je niet verteld wordt !'

    Een Conspiratie met de CAFT: Deze buitegewoon lid van de Raad van State, A. Bakker,  zal uitleg moeten geven over de 6 pagina tellende CAFT rapport d.d. 4 maart 2016 aan de Minister van Financiën, dhr. A. Bermudez, welke ervoor gezorgd dat Aruba weer miljoenen heeft kunnen lenen, met goedkeuring van Minister R. Plasterk, en Premier M. Rutte, terwijl in dit 6 pagina tellende rapport een aantal woorden verschijnen met de volgende frequenties: “tekort 18x,  waarvan tekortnorm 4x, voorlopig 12x, verwacht 11x, verbeter 6x, gebleken 3x, graag 3x. plan 3x, raming 3x, ruim 3x, signaleert 2x, summier 1x, tentatief  1x, tijdelijk 1x, schatting 1x, en het woord DEFINITIEF…maar 1 x.”  

  • Ken ta ingenuo? Mike de Meza, Richard Arends of ESNAN cu a kere nan y duna nan card blanche?

    Ken ta ingenuo? Mike de Meza, Richard Arends of ESNAN cu a kere nan y duna nan card blanche?

    UPP na varios ocasion a bin ta adverti e 21 miembronan di parlamento pa no bay ciegamente tras di loke gobierno di Aruba a presenta bou di nan nanishi, pa loke ta e supuesto reapertura di e refineria, cu mas bien ta un "upgrader" of “blender”. Nos a spera un parlamento cu lo a exigi e tempo necesario y exigi tambe TUR documento (tambe esunnan secreto cu lo ta existi segun nos por a comprende for di declaracionnan di sr. Koenders, minister di exterior di Hulanda) encuanto e deal cu Citgo pa asina por a haci un estudio riguroso y profundo cu e unico proposito pa evita cu nos pueblo hay'e den un debacel. Pero POPULISMO tabata mas importante, en todo caso pa e 19 parlamentario y 9 minister (incluyendo Otmar Oduber). Incluso tabata tin parlamentarionan cu a pretende cu sin lesa e documentonan en cuestion, e tabata convenci cu e contrato cu Citgo ta mihor cu esun cu na 1989 Coastal a cera durante e gobernacion  di Gabinete Oduber I. 

  • Populismo y neo-liberalismo den aña di campaña

    Populismo y neo-liberalismo den aña di campaña

    Na maart di e aña aki UPP a denuncia cu e hecho cu ta e propio trucknan di Serlimar, bou instruccion di e director di Serlimar di e tempo ey hunto cu e minister responsabel, tabata tira sushi den candela, pa di e manera ey tene e candela cendi. Lider di UPP, Booshi Wever a mustra esaki via di su Facebook cu potretnan cu e mes a saca. Mientras cu e tempo ey kier a laga pueblo kere cu ta “otro hende” ta pega sushi na candela.

  • Powered by SETAR