Reaccion: Ennia Caribe Holding mes no ta sospechoso den caso Saffier

Reaccion: Ennia Caribe Holding mes no ta sospechoso den caso Saffier

Posted on 10/25/2017 4:25 pm AST | Updated on 10/25/2017 10:32 pm AST

WILLEMSTAD – E caso cu a tuma lugar ayera di entrada hudicial na Ennia Caribe Holding, no ta relaciona directamente cu e compania sino un cliente di e compania. Un dia despues cu e informacion a sali cu tabatin entrada hudicial na e establecimento, e compania a reacciona oficialmente. “Den cuadro di e investigacion Saffier, Huez Comisario encarga cu casonan penal a duna ordo pa un entrada hudicial na e compania Ennia Caribe Holding” e compania ta bisa entre otro. “Ta destaca cu Ennia ni su trahadonan ta sospechoso den e caso. Ta trata un caso contra un ex cliente di Ennia cu ta sospechoso den un caso penal”, e compania ta sigui bisa.

COOPERACION

E compania a sigui bisa cu e entrada hudicial a tuma lugar berdad diamars dia 24 di october, y cu e directive di Ennia a duna tur cooperacion y ‘lo sigui haci esaki tambe’. “Durante e investigacion, Ennia lo abstene di duna cualkier comentario publico relaciona cu e caso aki”.

MINISTERIO PUBLICO

Di parti di ministerio publico mas prome, a duna informacion riba e caso, unda cu a confirma e entrada hudicial bou di mando di hues comisario, den presencia di e fiscal y e TBO (Team Bestrijding Ondermijning), na e oficina di Ennia Caribe Holding NV. OM tambe ta reitera cu Ennia mes no ta un sospechoso den e caso aki. “Durante e entrada hudicial, a tuma documento, computer y informacion digital den beslag, pero no a haci niun detencion. foto cortesia Curacao Chronicle. 

  • A haya un resto mortal mas di grupo indocumenta Venezolano

    A haya un resto mortal mas di grupo indocumenta Venezolano

    ORANJESTAD /WILLEMSTAD - A haña un resto mortal mas di e grupo di indocumenta cu nan lancha a faya cu nan riba laman. Asina vocero di warda costa Roderick Gouverneur a confirma. Awor e cantidad di morto ta 5. Helicopter ta buscando atrobe. Awor cu 48 ora a pasa tin chens cu mas curpa lo drif bin ariba.

  • Ministerio publico ta desmenti extradicion Jamaloodin

    Ministerio publico ta desmenti extradicion Jamaloodin

    WILLEMSTAD – E ex minister di Corsou George Jamaloodin no ta wordo extradita. Vocero di ministerio publico di Corsou y St Maarten ta desmenti e informacion cu a keda publica riba front page di e corant Extra e siman aki. E noticia no ta cuadra cu berdad, segun Serphos a sigura e portal aki. Ora cu a puntra ki dia si, Serphos a bisa, “Nada ainda”. E matutino di Corsou a publica diahuebs riba su front page cu Jamaloodin definitivamente lo keda extradita for di pais bisiña Venezuela. Esaki despues cu aña pasa autoridad Venezolano a bay di acuerdo cu e extradicion. Tramite a cuminsa pa e extradicion, pero no tin fecha ainda. Unda Extra a saca e informacion aki, no ta conoci. Jamaloodin ta wordo sospecha di un cantidad di cos pa cual e tin cu bin responsabiliza su mes na Corsou. Ora cu a pidie voluntariamente entrega su mes, e no a reacciona, pa cual a pidi un orden di aresto pe. Autoridad Venezolano a cumpli cu esey y tine deteni na e pais bisiña, pendiente su extradicion.

  • OM na Corsou a bende avion na findishi pa 700.000 dollar

    OM na Corsou a bende avion na findishi pa 700.000 dollar

    WILLEMSTAD - Findishi di Ministerio Publico (OM) Corsou di un avion CanadAir cu 11 asiento (registracion N545SD) a sera awe 30 di december 2017. A bende e avion finalmente pa 700.000 dollar Mericano.

  • Martina: Avianca no ta tuma InselAir international over mas

    Martina: Avianca no ta tuma InselAir international over mas

    WILLEMSTAD – E posibel union of fusion entre InselAir International y Avianca no ta sigui mas. Asina minister di economia di Corsou Steven Martina a informa diahuebs durante un conferencia di prensa, segun e vespertino di Corsou Antiliaans Dagblad. E compania madre Synergy ta bula afo y pues asina termina un negociacion di 9 luna despues cu a firma un ‘letter of intent’, cu awor ta keda solamente na ‘intento’. Complicacion huridico pa tuma e compania ta un di e motibo principal segun presidente di e comision negociado Etienne Ys. Segun leynan local, un compania di afo no por tuma accionnan mayoritario di un aerolinea over. E por crea problema cu paisnan internacional relaciona cu acuerdonan bilateral. E paisnan ta haci deal cu aerolineanan a base di nan caracter nacional, pero no por haci esey si e doño di e compania ta uno di afo. Gobierno di Corsou a informa cu awor nan ta bay busca otro alternativa pa toch logra rescata e aerolinea local. Inicialmente a bisa cu e unico forma cu por a salba InselAir International, ta cu e union of toma di Avianca. Awor esey ta cambia y ta mustra cu lo sigui busca mas alternativa. Foto cortesia Antiliaans Dagblad.

  • Homber sentencia pa a cende auto di vocero di ministerio publico na candela

    Homber sentencia pa a cende auto di vocero di ministerio publico na candela

    WILLEMSTAD – E homber J.L.F.P. (Curaçao, 1990) a keda sentencia awe pa a cende un auto na candela intencionalmente. E castigo impone ta 15 luna di castigo di prison, di cual 5 ta condicional, y 3 aña periodo di prueba. Huez a tene cuenta cu ta trata di un persona cu ta un ‘first offender’. E caso tabata ora cu e persona aki a cende auto di e vocero di ministerio publico Norman Serphos na candela na mei di e aña aki.

  • Contracto di 79 miyon dollar otorga pa sostene operacion FOL na Corsou

    Contracto di 79 miyon dollar otorga pa sostene operacion FOL na Corsou

    ARLINGTON, Va., December 18, 2017 – PAE (Pacific Architects and Engineers Incorporated) a haya un contracto di 79 miyon dollar pa provee sosten pa e base conoci como FOL (Forward Operating Locations na Aruba y Corsou. Entre e loke e compania tin cu provee, nan mester prove operacion di supervision aereo pa bringa droga, planea mision y ehecucion, personal permanente asigna, ekipo y facilidad, ekipo y facilidad. E periodo valido pa e oferta ta un aña di base y un opcion pa 4 aña mas. Fuente PAE. Foto cortesia 12th US Airforce. 

  • Powered by SETAR