ORANJESTAD- Manera ta conoci, awe mainta (dialuna 23 di october) a tuma luga un accidente unda dos truck di sushi di Serlimar tabata envolvi hunto cu un auto particular. Serlimar ta un compania cu semper ta pone seguridad durante maneho di desperdicio como prioridad. No ta conoci ainda kico tabata e motibo di e incidente, pero ya caba Serlimar ta haci su investigacion y na mes momento lo warda rapport di Polis prome cu saca un conclusion concreto di kico realmente a socede.
LAMENTA
“Serlimar ta lamenta e sucedido di accidente na Cura Cabay y ta tuma e incidente aki hopi na serio”, vocero di Serlimar Lionel Croes ta enfatisa. Croes ta amplia cu Serlimar tin un procedura importante di seguridad cu ta tuma lugar na momento cu tur truck sali pa nan ruta. Tambe cada truck ta cumpli cu sistemanan di seguridad hopi halto unda cu si tin cualkier fayo cu e truck, elo duna cualkier indicacion imediatamente. Investigacion ta sumamente importante y lo mester haci esaki debidamento conhuntamente cu Polis di trafico. Cualkier resultado cu wordo demostra pa medio di investigacion, Serlimar lo tuma tur paso necesario pa cu esaki pa asina continua garantisa seguridad na tur momento. Internamente Serlimar lo tuma pasonan tambe di precaucion pa asina tur trahadornan continua aplica seguridad durante trabou na tur momento, como tambe den trafico y maneho di trucknan di sushi. “Serlimar ta desea pronto recuperacion na e heridonan di e incidente. Tambe nos ta spera cu e tipo di incidente aki no bolbe ripiti”, Croes ta finalisa. Serlimar ta pidi si tin cualkier testigo, pa por fabor tuma contacto cu Serlimar na 5245080.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
ORANJESTAD - Entrante 18 di april 2024, pa 9or di anochi via TeleAruba, Aruba completo lo por cuminsa presencia e serie documental ‘Blue Lizard Effect’. Un serie documental revolucionario cu ta profundisa su mes den e mundo fascinante di Aruba, pero di un angulo diferente. E serie ta explora e concepto energetico di felicidad y e conexion profundo cu e cultura, e hende, y naturalesa di e isla.