Sociaal Economiche Raad (SER) a celebra 30 aña di exsistencia

Sociaal Economiche Raad (SER) a celebra 30 aña di exsistencia

Posted on 10/20/2017 4:19 pm AST | Updated on 10/20/2017 6:24 pm AST

ORANJESTAD - Diabierna 20 di october 2017 na oficina di SER situa na L.G.Smith Boulevard 176, den presencia di Su Excelencia Gobernador suplente sra. Yvonne Lacle- Dirksz, SER hunto cu un grupo di invitado y miembronan di prensa, a celebra su 30 aña di exsistencia.

A inicia e atardi cu inauguracion di e sala di reunion dedica y nombra na defunto colega sr. Guido Reiziger, pa cual Su Excelencia Gobernador suplente y yiu di defunto colega sr. Leroy Reiziger a corta e sinta.

Voorzitter di SER, sr. Rudy Geerman a continua cu un discurso den cual entre otro ela splica cu aunke ta celebrando 30 aña di exsistencia di SER e inicio di SER ta data ya caba for di aña 1966 caminda partnernan social di Aruba tabata forma parti di SER Antias. SER a ser lanta inspira pa ILO den cual gobierno ta crea e oportunidad pa e partners social den comunidad delibera y duna conseho encuanto e maneho di gobierno riba tereno social economico. Aruba mescos cu e otro islanan den reino tabata tine tempo ey 2 representante den e conseho aki y un biaha pa luna nan tabata reuni y cada bes na un otro isla. Na 1987 despues di nos Status Aparte SER Aruba a ser funda.

SER den e ultimo 5 añanan a mira e necesidad di busca aliansa na SERnan internacional considerando e efectonan di nos mundo actual cu ta ser influencia pa miedo di techonlogia y globalisacion. SER Aruba a estrecha su lasonan di cooperacion cu otro SERnan den reino y e asina den 2012 SER Aruba bira miembro di e Asociacion Internacional di Conseho Social Economico y Organisacionan Similar yama AICESIS. Siman pasa SER Aruba hunto cu SER Corsou a haci un bishita di trabou na Hulanda caminda a tene encuentronan cu SER Hulanda y institutonan y organisacionanan importante. Na e celebracion tabata t'ey presente como invitado tambe e Director secretario di SER Corsou sr. Raul Henriquez cu tambe a hiba palabra. Sr. Henriquez a splica di e importancia pa fortifica e lasonan di cooperacion entre SERnan den Reino, den cuadro di hisa e nivel y calidad di funcionamento di e organonan.

Por ultimo e secretaris di SER sr. drs. Felix Bijlhout a presenta un brochure informativo y a lansa e website nobo di SER. E programa oficial di e celebracion a termina cu un recepcion pa tur e invitadonan.

  • Powered by SETAR