Smac y polis a tene nan prome reunion pa temporada di carnaval 2018
ORANJESTAD - SMAC a sinta hunto cu Korps Politie Aruba (KPA) pa asina discuti e temporada di Carnaval 64. Durante di e reunion SMAC tabata representa pa miembronan di su Directiva, Presidente Sra. Henriquez y Secretaris Zuleika Wever, como tambe delegacion di KPA cu tabata encabesa pa Sra. Gordon y Sr. Soemers y acompaña pa representantenan di districto di San Nicolas, Oranjestad y Sta. Cruz.
SMAC y KPA ta convenci cu hunto por yega na un relacion estrecho y duradero entre nan dos, prome, durante y despues di temporada di Carnaval. Ta di acuerdo cu orden publico y seguridad di participantenan y publico ta keda prioridad y e meta principal di ambos SMAC y KPA. Di e manera aki ta sigura cu tur hende, carnavalista, publico y bishitantenan por gosa optimalmente durante eventonan y paradanan.
Den e prome reunion aki a presenta na KPA e schedule tentativo pa Carnaval 64 pa di e forma aki haya conseho y aprobacion di KPA pa fechanan y rutanan stipula pa eventonan y paradanan. Hunto a repasa y yega na un consensus riba gran parti di e Schedule mirando cu e un temporada di mas o menos 5 siman. Ainda tin algun puntonan cu lo mester ahusta y confirma. A confirma cu no tin mucho espacio pa por agrega mucho mas mirando cu tur weekend e ta ful yen y hasta den siman tin algún actividad cu lo tuma lugar. Consehonan ariba por ehempel; iluminacion suficiente na cierto puntonan, cantidad di agente policial pa cada grupo di Carnaval y orarionan di diferente eventonan y paradanan lo yuda SMAC cu e organisacion di Carnaval 64.
Den e lunanan nos dilanti lo cuminsa cu e stakeholders meetings, cu lo tuma lugar frecuentemente y di awo caba lo cuminsa mirando cu e temporada di Carnava mes no lo permiti mucho encuentro cu e stakeholdersnan, caminda aña pasa esaki a keda subi segun e frecuencia pa tur siman. Esaki ta un reunion cu lo consisti di representantenan di KPA, Brandweer, IMSAN (Ambulance), DOW, DTI, DESPA y Serlimar. Esaki ta pa hunto evalua cada evento pa mira unda mester tin cambio of mehoracion pa tur cos cana bon.
SMAC lo sali afo dentro di algun dia cu nan prome Conferencia di Prensa, pa presenta e cuenta anual, Presidente Sr. Shannon Henriquez y su directiva di SMAC ta gradici pueblo en general pa nan sostén y aporte na Carnaval 63 y ta conta cu e mesun entusiasmo y positivismo pa loke ta e evento di 11/11 venidero y Carnaval 64.
Kes the Band di Trinidad confirma pa Flip Flop Festival na juni!
ORANJESTAD – E banda popular di Trinidad Kes the Band ta confirma pa presenta durante e proximo edicion di Flip Flop Festival dia 1 di juni proximo. Durante un conferencia di prensa diahuebs atardi, organisadornan a anuncia esaki, como un di e varios bandanan internacional cu lo ta presente durante e anochi aki. E intencion ta pa dentro di 2 siman presenta demas artistanan internacional tambe. E evento lo tuma lugar riba Bushiri Beach, y lo ta parti den varios seccion. A cuminsa bende carchi caba awe unda cu e prome cantidad di carchi ta bay na 45 florin estilo ‘early bird’ pa tempo limita. Flip Flop Festival ta un producto di cerbez Chill, y Brouwerij Balashi hunto cu Tropical Bottling Company su productonan Coca Cola y Bacardi. Fuera di e artistanan internacional, lo tin artistanan local manera e.o. Tsunami.
Video: Con a yega na titulo di documentario ‘I can’t be moe’ ?
ORANJESTAD – Diabierna awor tin estreno di e documentario localmente produci titula ‘I can’t be moe’. Un documentario unda cu e productor ta sigui e bida di e conocido personahe local Alice van Romondt durante 2 aña. Pregunta ta, con a yega na e titulo asina ‘captivo’, un combinacion di Ingles y Hulandes y con esaki a yega pa bira e titulo di e documentario. Tanto e productor Rebecca Roos, como e suheto di e documentario, Alice van Romondt a splica esaki den e programa Noticiacla LIVE diamars anochi. E documentario ta pasa diabierna anochi 19 di april pa 8'or di anochi den Cas di Cultura y ta costa 25 florin pa entrada.
Carlos Bislip cu concierto gratis di JAM riba Dia Mundial di Jazz
ORANJESTAD – Manera a bira conoci caba, sigur anto pa tur amante di e genero musical aki, luna di april ta celebra mundialmente e aprecio pa jazz. Un di su promotor y exponentenan di mas grandi riba nos isla, esta e maestro di percusion Carlos Bislip a sa di prepara, un biaha mas, un merecido celebracion.
Aruba One Happy Island Lions Club y Friends of Lions a yuda mas di 500 personaden necesidad
ORANJESTAD - Recientemente Fundacion Aruba One Happy Island Lions Club hunto cu Friends of Lions a organisa e prome “Tayo riba Mesa”, pa aña 2024. Esaki ta un proyecto den cuadro di e programa di Lions International “Hunger Relief”, caminda danki na e sosten di comunidad y Friends of Lions ta yuda famianan den necesidad.
Conocido musico Ivan Jansen reconoci pa su ’contribucion na herencia cultural di Aruba’
ORANJESTAD - Diaranson anochi na Cas di Cultura, Minister Maduro di den nomber di Gobierno di Aruba, presenta un reconocemento na sr. Ivan Jansen pa su contribucion significante na e herencia cultural musical di Aruba. Segun e mandatario, den e documental presenta riba Jansen, nos ta cera conoci cu e musico Ivan hopi mas di acerca, ya e ta bay comparti su historia di su carera musical, su conocemento, produccionnan, su contribucionnan na diferente musiconan/artistanan local, alabes su logronan local y internacional y e retonan cu ela encontra durante su carera musical E mandatario a repasa e CV impresionante di e musico tambe, indicando cu Ivan no ta solamente un musico, un guitarista clasico y di jazz, sino tambe e ta productor, compositor, areglista, educador, lider di banda y empresario. “Nos ta sinti nos orguyoso di un video documental contando historia di un Arubiano y produci door di nos mes yiunan di tera. Cu e iniciativa di Ivan aki por inspira mas persona cu tin un historia pa conta, pa traha un documental. Asina nos por laga e historia atras pa generacionnan cu ta bini despues di nos” e mandatario a bisa entre otro.
Conocido ciudadano Alice van Romondt ta enfoke principal di un documentario nobo
ORANJESTAD – Conocido ciudadano di Aruba Alice van Romondt, ta bira e centro di atencion durante un documentario largo metrahe di e productor di cine Rebecca Roos cu lo ta visible durante e di 10 edicion di Curaçao Internacional Film Festival e siman aki. E documentario, titula “ I can’t be moe; Alice van Romondt (I can’t be tired)” ta keda present ana Corsou entre dianan. 12 y 14 di April. Un siman despues, lo estrena e pelicula akin a Cas di Cultura. Prome cu e estreno na Aruba tin oportunidad unico di wak un exposicion di un seleccion di Alice su collecion priva di arte den e sala di expo di Cas di Cultura for di 6:30 PM.
Follow NoticiaCla
