ORANJESTAD - Manera NoticiaCla a raporta caba, awe mainta den edificio di APA, a inicia e reunionnan di formacion di e proximo gobierno di nos pais entre e tres partidonan. Lidernan di tur tres partido y nan conseheronan y miembronan di comision tawata presente pa asina duna inicio na e negociacionnan cu lo tuma luga pa asina pronto Aruba conoce un gobierno di coalicion manera pueblo a pidi p’e. Lider di Partido MEP, Evelyn Wever-Croes, kende tambe ta Formador di gobierno nobo ta amplia riba e procedura di formacion di gobierno como lo siguiente: “Diahuebs ultimo, mi a ricibi e encargo di Formador for di Gobernador y den cuadro di esaki nos lo bay cuminsa cu diferente reunionnan. Mi a haya instruccion pa purba forma un gobierno di coalicion entre partidonan MEP, POR y RED.
RUMORNAN
"Den e ultimo dianan desde cu Gobernador a nombra mi como Formador, tin basta rumornan y speculacionnan ta circula di diferente aspectonan di formacion. Ta asina cu te hasta e gobierno a wordo forma caba cu varios diferente minister. Sinembargo, tur esakinan no ta corecto y ta completamente falso. Awe nos ta bay cuminsa. Y e procedura ta bay tuma luga den e siguiente fasenan: Acuerdo di Formacion: Esaki ta e combersacionnan tocante e puntonan den lineanan general pa yega na un programa di gobernacion. Programa di gobernacion: Despues cu nos tin e Acuerdo di Formacion defini, nos lo bay na e programa di gobernacion. Tur e puntonan cu partidonan a bay campaña cu ne, ta wordo descuti pa asina cada vision wordo inclui den nos programa di gobernacion. Ta importante pa tuma tempo pa descuti tur e puntonan aki pa asina nos por yega na palabracionnan concreto pa brinda pueblo un gobierno stabiel. Reparticion di Carteranan: Una bes cu nos yega na e fase aki, Partidonan ta bay bek den nan seno pa palabracionnan kende lo bira candidatonan pa minister cu lo representa nan partido pa eherce e diferente funcionnan. Proceso di Screening: Candidatonan apunta pa bira minister lo pasa un proceso di screening. Una bes cu e resultado di screening drenta, nos lo entrega e reportahe na Gobernador, cu e deseo di a forma un gobierno cu un base amplio manera Gobernador a pidi.” Wever a sigui bisa. Wever-Croes ta sigui bisa cu no solamente el a haya encargo pa forma e proximo gobierno sino tambe pa reuni cu diferente instancianan na Aruba, gremio, departamento di gobierno, sector priva y instancianan social y caritativo. Nos lo bay tene cuenta cu esnan cu ya caba a reuni cu informador y lo invita e otronan durante e simannan aki.“Ta bay ta dos trayectoria pareu cu lo tuma luga den e dianan aki, ambos sin duda lo bay ta hopi pisa, pero atencion principal ta pa forma e gobierno." Wever a sigui bisa.
PRENSA
Wever-Croes a conclui bisando cu lo tene prensa informa lo maximo posibel di e procedura di formacion di gobierno nobo. Alabes e ta pidi pa prensa duna espacio y trankilidad pa yega na un bon acuerdo. Y ta priminti cu manera tin algo di informa, lo yama prensa pa asina pueblo tambe keda bon informa di henter e procedura.
ORANJESTAD – Awe mainta manera custumber, gobierno di Aruba a participa na e ceremonia protocolario relaciona cu Dia di Himno & Bandera. Despues a sigui e acostumbrado desfile di gruponan. Mester bisa cu varios grupo deportivo e biaha aki tabata notablemente ausente. Potretnan cortesia di gabinete Wever-Croes, y e varios ministernan di e gabinete.
ORANJESTAD – Varios dignitario di Corsou a presencia e ceremonia protocolario na Plaza Betico relaciona cu celebracion di Himno & Bandera. Entre nan por a nota presencia di ministernan Sithree van Heydoorn y Javier Silvania. Ta custumber cu ora cu tin celebracionan asina, cu mandatarionan di otro isla ta bishita nos isla y forma parti di e celebracion. Consul General di Merca na Corsou Margareth Born tambe tabata na Aruba na occasion di e celebracion aki. Potretnan cortesia di ministernan Geoffrey Wever y Ursell Arends.
ORANJESTAD – Mientras cu e electorado 2025 ta mustra prometedor, ta te 2029 un gobierno sin AVP y MEP ta probable. Asina parlamentario y lider di partido ACCION21 Miguel Mansur ta splica diabierna. E parlamentario ta sigui repasa datonan adkeri riba eleccionan anterior pa ilustra su punto. Mansur ta recorda cu na eleccion 2013, 57.794 persona a vota pa 6 partido, 88% di voto (50.756) a bay pa AVP of MEP y 12% (7.038) a bay pa un alternativa. Na eleccion 2017, 58.652 persona a vota pa 8 partido, 77,5% di voto (45.437) a bay pa AVP of MEP y 22,5% (13.215) a bay pa un alternativa. Na eleccion 2021, 58.610 persona a vota pa 12 partido, 67% di voto (39.035) a bay pa AVP of MEP y 33% (19.575) a bay pa un alternativa. Den cada un di e ultimo tres eleccionnan e alternativa(nan) pa AVP y MEP a crece mas cu 10% di un forma consistente.
ORANJESTAD – E siman aki minister Dangui Oduber a tene un reunion cu e dokternan di cas pa duna un splicacion y duna un presentacion con ta bai traha hunto pa reforsa e prome liña di cuido conforme e zorgakkoord cu a wordo firma na juni 2023. Un acuerdo unda cu tin diferente iniciativa delinia pa wordo ehecuta un pa un den e siguiente añanan.
ORANJESTAD – Gobierno di Aruba a firma cu ELMAR pa trahadonan di departamento di gobierno usa autonan electrico solamente. E intencion ta pa cuminsa prome cu e departamento economico DEACI, pero e plan final ta pa tur auto di gobierno pa autonan electrico.
ORANJESTAD – Cu introduccion di e Codigo di procedimento penal (Wetboek van strafvordering) nobo siman pasa, cu ta drenta na vigor 1 april proximo, tin varios cambio interesante segun minister di husticia Rocco Tjon. Entre otro ta bay percura cu Ministerio Publico y e organisacionnan cu ta haci investigacion tin mas autoridad pa na un manera mucho mas eficiente y eficaz por combati criminalidad. Na mes momento, lo bay garantisa mas derecho pa detenidonan y victimanan.