DNM: Ponencia di piscadornan riba lista di prohibicion pa pisca no ta cuadra!

DNM: Ponencia di piscadornan riba lista di prohibicion pa pisca no ta cuadra!

Posted on 10/12/2017 5:15 pm AST | Updated on 10/13/2017 2:31 am AST

ORANJESTAD - Referente e Decreto Nacional (landsbesluit) nobo cu a sali cu ta trata e proteccion di flora y fauna local cu ta na peliger di extincion y di balor ecologico, Directie Natuur en Milieu (DNM) a trece un aclariacion diahuebs atardi pa medio di un comunicado. Segun DNM, e ponencia cu e lista di piscanan incluyendo e Kreeft, ta sortonan cu awo no ta permiti pa mata of pa herida, no ta completamente corecto. Varios di e piscanan y e Kreeft ta proteha caba desde aña 1995 den e Ordenansa Nacional di Proteccion di Naturalesa articulo 13 (Natuurbeschermingsverordening). E unico sortonan cu a haya e status di proteccion e aña aki ta e Atlantic Bluefin Tuna, Nassau Grouper, Goliath Grouper y e famia di e Gutu (Parrotfishes).                                                                                                                         E Atlantic Bluefin Tuna, Nassau Grouper y Goliath Grouper ta sortonan cu ta mundialmente den peliger di extincion a base di datonan internacional.

Pa loke ta trata e famia di Gutu, tin rapportnan di entre otro United Nations cu ta demostra e balor ecologico di e famia di Gutu pa cu e rifnan di coral. E famia di Gutu a haya e status di proteccion pa e motibo cu su presencia den e rifnan di coral ta hopi importante.

Si e Gutu no t’ey pa come e alganan cu ta crece riba e rifnan esaki lo causa e morto di e coralnan ya cu e alganan ta crece mas liher cu e coral. Na mesun momento e morto di e coralnan ta causa desaparicion di e diferente sortonan di pisca y otro bida marino cu ta depende di e rifnan di coral. E desaparicion di coralnan den nos awanan lo tin un efecto negativo pa nos mesun piscadonan cu ta depende di e piscanan cu ta biba riba nos rifnan.

Manera menciona caba, DNM kier enfatisa cu e otro piscanan y entre otro e Kreeft y e Calco, ta sortonan cu tin un status di proteccion for di aña 1995 y e Calco for di añanan 80.

Na 2007 a institui e ‘Commissie Flora en Fauna’ cu a haya un concepto di lista di flora y fauna for di Santa Rosa (DLVV). E ‘Commissie Flora en Fauna’ a involucra e dos autoridadnan riba e tratado di CITES cu ta Departamento di Veterinario y Santa Rosa (Santa Rosa ta representa tambe den e directiva di Centro di Pesca di Hadicurari) pa sigui traha riba e lista aki.

A scucha e dos departamentonan aki y a ricibi nan sugerencianan cu ta inclui den e lista. Tambe e ‘Commissie Flora en Fauna’ a inclui e lista di piscanan di coral e tempo aya caba cu tabata inclui 108 sorto di pisca di coral.

Na 2013 Departamento di Legislacion a manda e lista aki pa DNM pa splica detayadamente cu argumento fuerte, pakico tur e sortonan di flora y fauna ta riba e lista pasobra no tabata tin motivacion suficiente di esakinan.

DNM a traha riba criterianan pa e sortonan por bini e lista proteccion aki. Tambe DNM a haci un peticion na Santa Rosa y Servicio Veterinariopa entrega nan motivacion pakico e sortonan indica mester ta riba e lista aki. Pa loke ta trata e piscanan, usando e criterianan traha, a keda solamente di e 108 sortonan di pisca riba e lista original di e ‘Commissie Flora y Fauna’, e famia di e Gutunan y e Nassau Grouper. Acerca a bin e Goliath Grouper y e Atlantic Bluefin Tuna.

Tur e sortonan cu ta proteha for di aña 1995 caba, tambe a forma parti di e lista. Asina nan a haya extra proteccion incluyendo entre otro nan webo y nan neishi.

Na 2017 Raad van Advies a sugeri pa tur sorto di pisca di coral bini riba e lista aki un biaha mas. DNM a analisa e sugerencia y a mustra Raad van Advies cu esaki no ta cumpli cu e criteria traha pa bini riba e lista di proteccion y cu e lo bay afecta e piscador tambe.

DNM mester remarca cu Santa Rosa a haya e lista di flora y fauna na 2013. Di cual nan a manda nan motivacion pa proteccion di e sortonan di flora. Pero riba e lista di fauna nan no a duna comentario. Loke si tin cu remarca ta cu tabata tin hopi discusion riba e Kreeft cu si of no e ta proteha, y si e no ta proteha pa e ora bini cu regulacion di entre otro e Kreeft.

Cu asombro por tuma nota cu Santa Rosa, awor cu e ley ta na vigor, ta bin cu e remarke cu nan lo bay wak cua efecto e lista di flora lo tin riba criadornan di cabrito, mientras cu nan mes a yuda traha riba e lista di matanan. Ningun momento den e proceso Santa Rosa a trece esaki como punto di atencion.

DNM ningun momento ta contra di e piscadornan. Al contrario, DNM lo ta dispuesto pa traha conhuntamente cu nan. E punto di salida, claro, no por ta cu no por proteha ningun sorto di especie marino.                                                                                                                                                                           Si ta bay opta pa regulacion, ban haci esaki conscientemente. Varios biaha DNM a pidi instancianan, entre otro Hadicurari y Santa Rosa e rapportnan, cu nan mes a indica cu nan tin, cual nunca nan a manda pa asina DNM logra yega e meta aki.

DNM mester aclaria tambe cu e ley no ta un ley di piscamento sino un ley pa proteccion di naturalesa incluyendo nos bida marino. Lama ta di nos tur, pero e no ta un fuente inagotabel di recurso.

  • Famia di hoben Leoni Brokke lo colecta placa atrobe diasabra

    Famia di hoben Leoni Brokke lo colecta placa atrobe diasabra

    ORANJESTAD - Diasabra famia di e hoben Leoni Brokke, cu a haya accidente dia 16 September 2016, unda cu nan lo ta para na tur rotonde di Aruba, pa asina colecta placa pa por sigui paga su tratamento na Colombia.

  • SETAR a repasa e 15 aña di e compania como NV y e bista pa futuro durante nan ‘Business Event 2018’

    SETAR a repasa e 15 aña di e compania como NV y e bista pa futuro durante nan ‘Business Event 2018’

    ORANJESTAD - Diahuebs anochi Setar NV a organisa e di 14 Business Event, cu a tuma lugar na Marriott Ballroom. Durante e evento anual aki Director di SETAR NV sr. Roland Croes a elabora di tur e logronan den SETAR 15 aña como compania NV. E la menciona tambe kico e situacion actual ta di SETAR y loke ta e posicion di SETAR den futuro. Manera custumber cu tin un orador special cada bes. E biaha aki e orador invita pa SETAR tabata Steve Brown, un persona cu 30 aña di experencia den “high tech” y actualmente ta yuda companianan internacional compronde con e futuro ta cambiando cu tecnologia.

  • CITGO a desactiva badge di trahadornan di contratistanan di refineria

    CITGO a desactiva badge di trahadornan di contratistanan di refineria

    SAN NICOLAS – Tres dia despues cu CITGO a informa NoticiaCla cu nan ta ‘slow down’ e proceso di rehabilitacion di e refinernia, nan a cumpli cu nan declaracion y cera badge di tur trahado di contratistanan. Fuentenan cerca di e proceso a confirma pa e portal cu e trahadornan tabata para pafo di e refineria, y no por a drenta. “E consorcio VEC a wordo bisa ayera cu nan contract a caba y a bira manda tur trahado di contratista cu ta traha pa nan, un carta”, e persona cu a papia riba condicion cu e ta keda anonimo, a sigui bisa. “Nan a manda e trahadornan un carta pa 3:50pm cu ta kita nan for di trabou 4pm. E persona a bisa tambe cu for di december, no a paga e trahadornan mas. Mientrastanto ministerio di Labor a sigura e portal aki cu minister di Labor Glenbert Croes lo no otorga permiso di retiro na e companianan y CITGO.

  • Habitantenan di Wayaca/Primavera ta pidi auxilio pa ‘cruzada peligroso’

    Habitantenan di Wayaca/Primavera ta pidi auxilio pa ‘cruzada peligroso’

    ORANJESTAD – Habitantenan di Wayaca/Primavera a cuminsa pidi auxilio pa e cantidad di accidente di auto cu ta tumando lugar na e ‘skina peligroso’ na Wayaca. Den menos cu un siman tabatin dos accidente atrobe, y algun tempo atras tabatin algun mas serio unda cu te hasta muraya di cas a wordo kibra, y cu auto a bolter. E mesun skina aki ta ‘conoci’ pa e accidente fatal cu a tuma lugar algun aña atras ora cu un dama stranhero a perde su bida.

  • Aruba sede di e di 2 Kiwanis Divisional Council meeting

    Aruba sede di e di 2 Kiwanis Divisional Council meeting

    ORANJESTAD - Entre dia 22 cu 25 di februari Aruba lo ta sede di e di 2 “Divisional Council meeting” pa e aña Kiwanistico 2017 -2018. Ta trata aki di e reunion di e paisnan di Division 26 di e Eastern Canada and the Caribbean District di Kiwanis International. E biaha aki e ta uno hopi special ja cu ta conta cu presencia di “Governor di Eastern and The Caribbean District of Kiwanis International” Sr Robert “Bobby” MooYoung.

  • Simar: Decision final independisacion DPS den man di miembronan

    Simar: Decision final independisacion DPS den man di miembronan

    ORANJESTAD - Directiva di SIMAR a tuma nota di varios comentario y comunicado relaciona cu e topico di independisacion di scolnan publico. Segun e sindicato di maestro,ta di lamenta cu hopi informacion eroneo a ser publica cu no ta cuadra cu e berdad.

  • Powered by SETAR