Mio a gana gobierno den corte pa asunto di internet

Mio a gana gobierno den corte pa asunto di internet

Posted on 09/20/2017 6:45 pm AST | Updated on 09/20/2017 9:43 pm AST

ORANJESTAD – Mio Telecom a gana un caso di LAR contra gobierno e siman aki, cu ta nifica cu gobierno ta obliga di presenta e documentonan na MIO cu gobierno a uza pa determina cu un concesionario di Internet mester paga gobierno. Den e caso aki gobierno ta cobra 3% di nan entrada riba e parti aki. Gobierno a trabes di minister Arends a nenga di duna transparencia ariba e topico aki y p'esey MIO a haci un peticion base riba e LOB. E caso ya tawata un tempo andando y anteriormente MIO a gana un caso caba mas tempran e aña aki.

MIO a sigi cu e caso di LOB na corte di LAR y e siman aki a haña e veredicto dunando MIO rason. Gobierno awor tin 3 siman tempo pa habra buki y haci e e documentonan publico cu a wordo uza pa determina e cobransa di entre otro e 3%. Esaki kiermen cu otro ciudadanonan tambe tin e mesun derecho. MIO no ta exclui cu e cobransanan tawata tin mas bien un caracter prohibititivo pa asina stroba operadornan di existi y crece den e mercado. Si ta asina esaki ta contra reglanan internacional.

PREGUNTA

Segun abogado di MIO, mr. Dello Gomez, ta argumenta cu e minister mester cumpli cu ley y habri buki ora cu e ciudadano haci un peticion a base di LOB. Den e caso aki e minister no tawata tin base legal pa nenga e peticion. For di e documentonan cu gobierno tin cu presenta awor, MIO kier sa e motivacion di e cobransanan y e porcentahenan. MIO tin indicacion cu esaki no ta cuadra cu normaman cu ta aplicabel y cu esaki a wordo haci riba un forma arbitrario. Y pensando mas leu, MIO su abogado ta argumenta, cu si aki tin iregularidad, e situacion por ta mescos cu e cobransanan di e licensia (7 miyon cada 10 aña) y cu si esey ta e caso, por bien ta cu e cobransanan ey tampoco no ta corecto. Esey lo duna e compania (cu aworaki a perde su licensia pa incumplimento di netamente e pago miyonario ey) caminda pa cana pa bringa e parti ey tambe. E abogado a sigura e portal aki, cu mientras cu e licensia a wordo revoca pa gobierno, e compania no ta bancarota, contrario di loke a wordo informa anteriormente.

  • Powered by SETAR