- KVK: Mayoria compania ta pensa cu e scarsedad di trahado lo empeora
- HOH: Ocupacion di cama poco poco ta bek na normalidad na hospital
- Video: Ryçond Santos do Nascimento ta considera su entrada den AVP como un eror
- Mas turista Colombiano ta biahando pa Corsou envez di Aruba den 2024
- Minister a anuncia mando nobo temporal na Cuerpo di bombero
BCA: Ta mantene tasa di rekisito di reserva na 11%
ORANJESTAD - Durante e reunion di dia 1 di juni 2017 e Comite di Maneho Monetario (CMM)[1] di Banco Central di Aruba (BCA) a dicidi pa mantene e porcentahe actual di e tasa di rekisito di reservana 11 porciento y e tasa di avance na 1 porciento, despues di a evalua e datonan economico y monetario mas recien. A considera e siguiente informacion y analisis den e proceso pa yega na e decision aki.
RESERVANAN INTERNACIONAL
E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di april 2017. A registra aumentonan den ambos e reservanan internacional (+Afl. 36,1 miyon of +1,9 porciento) como cu den e reservanan oficial (+Afl. 25,6 miyon of +1,5 porciento), compara cu december 2016. Consecuentemente, e reservanan internacional y e reservanan oficial a yega, respectivamente, te na Afl. 1.928,5 miyon y Afl. 1.698,8 miyon na fin di april 2017.
DESAROYONAN DEN CREDITO
E crecemento di credito total di e banconan comercial a keda positivo (+3,9 porciento) na final di april 2017 compara cu december 2016. Mientras cu a registra caidanan den credito na consumidor (−1,7 porciento), a observa expancionnan den fiansa pa construccion di cas (+3,3 porciento), credito na empresa (+1,1 porciento) y e componente ‘otro’ di credito bancario (+32,4 porciento) durante e periodo di januari-april 2017. E ultimo ta refleha e compra di bononan di gobierno door di e banconan comercial.
INFLACION
Na april 2017 a registra un caida den e prijsnan compara cu e aña anterior (−0,1 porciento) como tambe den e promedio anual di inflacion (−0,6 porciento). Ambos bahada ta principalmente causa pa reduccion den e tarifa di coriente. E promedio di inflacion ora exclui e componentenan di cuminda y energia a yega na 0,4 porciento, primordialmente reflehando un aumento den e componente di vivienda di e CPI.
TURISMO
Durante e prome cuatro lunanan di 2017, e debilidad den e mercado Venezolano a sigui manifesta den caidanan den e cantidad di bishitantenan (−11,9 porciento) y anochinan permaneci na Aruba (−4,3 porciento). Di otro banda, a registra un expansion den e cantidad di turistanan crucero (+4,1 porciento), mientras cu e mercado Mericano a presta faborabelmente, loke ta refleha pa un impulso den e ingresonan turistico registra na banconan comercial (+2,5 porciento).
PLACA DEN CIRCULACION
Na april 2017 e cantidad di placa den circulacion a baha cu Afl. 43,1 miyon te na Afl. 4.137,8 miyon, compara cu e luna anterior. E caida aki ta debi na contraccionnan den e activo domestico neto (−Afl.17,9 miyon) y den e reserva di divisa neto (−Afl. 25,2 miyon). E caida den e activo domestico di placa den circulacion ta atribui na reduccionnan den credito domestico (−Afl. 11,2 miyon) y transaccionnan no relata na credito (−Afl. 38,3 miyon). Mientrastanto, e bahada den e reserva di divisa neto a resulta principalmente door di benta neto di divisa na publico (-Afl. 216,0 miyon), primordialmente relaciona cu pagonan pa importacion di mercancia, otro servicionan y transferencianan riba e asina yama ‘income account’. Esaki a wordo mitiga pa un gran parti pa compra neto di divisa for di publico (+Afl. 190,7 miyon), primordialmente relaciona cu entrada for di turismo, transferencia neto pa cuentanan den exterior di companianan local y servicio di transportacion.
MERCADO FINANCIERO
Na april 2017 a nota un caida den e averahe di interes riba prestamonan nobo (−0,9 punto di porcentahe te na 7,0 porciento), mientras cu e averahe di interes riba depositonan nobo a aumenta (+0,2 punto di porcentahe te na 1,4 porciento), compara cu e luna anterior. Consecuentemente, e averahe den e margen di e tasa di interes a cai cu 1,1 punto di porcentahe te na 5,6 porciento.
ADVANCE RATE
E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,10 punto di porcentahe na april 2017. Consecuentemente, no tabata tin rason pa cambia e “advance rate” di BCA.
[1] E CMM a ser institui na mei 2010 pa periodicamente evalua y determina e maneho monetario di BCA. Adicionalmente, CMM ta aspira pa mehora e transparencia di maneho monetario.
KVK: Mayoria compania ta pensa cu e scarsedad di trahado lo empeora
ORANJESTAD – Mayoria compania ta pensa cu e scarsedad di trahado na Aruba lo empeora. Asina Camara di Comercio ta raporta diaranson.
Mas turista Colombiano ta biahando pa Corsou envez di Aruba den 2024
BOGOTA – Mas turista Colombiano a bay Corsou envez di Aruba. Asina presidente ehecutivo di Asociación Colombiana de Agencias de Viajes y Turismo, (ANATO), Paula Cortés Calle ta raporta segun un raportahe di e portal Colombiano El Nuevo Siglo ta raporta. Mientras cu paisnan manera Merca, Spaña, Panama y Republica Dominicano ta conta pa 69% di e Colombianonan cu ta biaha pa exterior, e pais cu mas crecemento ta Corsou cu 157% di participacion, compara cu Aruba cu tin ‘apenas’ 63%. Hasta Hulanda tin mas trafico di Colombia, na 81%. Pero ta sigui Aruba cu 47% y Panama cu 44%. Segun ANATO, e prome trimester di 2024, 1.345.687 Colombiano a biaha pa exterior, cu ta un aumento di 13%, compara cu e mesun periodo aña pasa. “E resultadonan positivo aki ta refleha e recuperacion di turismo saliente, cu ta beneficia e industria relaciona, den e area, hotel y restaurant, entre otro” Cortés Calle a finalisa bisando.
Pa aña 2024 y 2025, ATIA lo enfoca mas riba e tema laboral
ORANJESTAD - Diabierna 19 di april 2024, Aruba Trade and Industry Association (ATIA) a tene su reuniun general di miembrecia den e sala di conferencia di ATIA.
Aruba Bank ta presenta un serie di entrevista cu su Mortgage Advisors – “Caweta di Hipoteca”
A.T.A: Turismo ‘stayover’ pa Aruba a crece cu mas di 25% den maart 2024
ORANJESTAD - Den e prome kwartaal di 2024, a conta cu cifranan prometedor pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA, a bisa den un comunicado. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’. E meta ta pa sigui mantene esfuerzonan den linea segun e balans menciona, y logra aumenta e entrada proporcionalmente mas cu e volumen cu nos destinacion ta ricibi. Capacidad di carga tambe ta sigui ricibi atencion di parti di A.T.A. di diferente manera.
Aruba ta den e top 5 pa loke ta e hafnan pa crucero den Caribe
ORANJESTAD – Aruba (y Corsou) ta figura den e top 5 di hafnan pa barconan crucero segun e portal cruisefever.net. Ta considera Aruba esun mas conoci di e islanan ABC, segun e portal. E haf di Aruba ta popular pa cruceronan cu itinerario di 8 pa 12 dia. E beachnan blanco, historia colonial, y e seguridad ta motibonan pa e escogencia aki. No descuida pa e oportunidad di compras tambe. Corsou tambe ta figura den e top 5 na di ultimo lugar, esta #5 compara cu Aruba cu ta na number 2. E edificionan colonial tambe y e ciudad Willemstad, e rifnan colorido y e cafenan interesante tabata motibo suficiente pa scohe e isla tambe. E prome pais den Caribe ta St Maarten, sigui pa Aruba, Grand Cayman, San Juan y Corsou.
Follow NoticiaCla
