Encuesta Final: Grupo indeciso ta mas chikito awor!

Encuesta Final: Grupo indeciso ta mas chikito awor!

Posted on 09/8/2017 11:39 am AST | Updated on 09/8/2017 12:00 pm AST

ORANJESTAD - E grupo di persona cu no sa pa ken vota ainda, a bira considerablemente mas chikito. Esaki ta un di e resultadonan di e ultimo encuesta di NoticiaCla/Doc Opleidingen cu ta keda publica awe. Di e 1592 persona cu a participa na e encuesta, 1564 persona tabatin derecho di voto. For di cua districto tabata mas activo, cua debate tabata  mas popular, te na e partido cu ta goza di mas simpatia te cu awor (segun e encuesta aki), tur e resultadonan ta conoci den e encuesta ultimo aki. 

INDICACION

Esencial ta e indicacion cu e encuesta ta duna, ya cu e tabata un encuesta habri pa tur hende. E info demografico ta yuda den forma profil di esun cu a contribui, pero nos no ta pretende cu e encuesta ta representativo pa opinion di e votadornan di Aruba. Como informacion adicional, nos a wak si ta tin diferencia significante entre opinion di e Millenials y e 50 plussers (edad 50 y mas halto) 

DIFERENCIA

Por lo general, e diferencia tabata basta chikito, cu excepcion cu e Millennials a bay mas den direccion di e partidonan chikito/nobo RAIZ y RED, nan tin tiki mas preferencia pa un coalicion y poco menos preferencia pa e partidonan tradicional. Entre esnan di 50 aña y mas halto, nan ta bai mas den direccion di partidonan grandi, menos preferencia pa coalicion y menos pa e partidonan chiquito. Pa cu e topiconan di importancia, e diferencia ta minimal. Pa cu e grupo cu ta indica cu nan no sa kico nan lo vota, den e Millennials ta 20% cu ta indica cu nan ta ‘swing voters’ , mientras den e grupo 50+ e ta 11% swing voters. 

RESULTADO

Entre e resultadonan, 42.6% tabata sa caba pa cua partido nan vota for di momento cu e campaña a cuminsa. Esey kier men cu mas cu mitar (57.4%) no tabata sa ainda. Pa loke ta e debatenan, esun di millennials a score miho cu un 7.2, y esun mas abou tabata e debate pa Latino cu 2.9. Den periodo di campaña pa esnan cu a participa, e grupo cu ta vota specificamente pa e persona riba lista a score mas halto cu 4.4, mientras cu esun cu tin e programa di partido, tabata hopi cerca cu 4.3, sigui pa debatenan na 3.7. Den e seccion di e topiconan mas importante durante campaña, tabatin un empate entre e topico 'situacion financiero/debe nacional' y 'seguridad na Aruba' unda cu ambos a score un 3.8. 'Servicio medico' y 'educacion' tambe tabatin un empate na di dos lugar cu 3.7. Pa esnan cu sa caba pa ken nan lo vota y pa ken no, tambe tabatin informacion interesante. Partido MEP y AVP ta lidera esaki den e categoria cu sigur nan lo vota pa nan, mientras cu partidonan CURPA y MAS ta lidera den esnan cu ta bisa cu no tin ningun chens cu lo vota pa nan. Otro resultado interesante, ta e parti di cu ken mester forma coalicion. Aki esnan cu a resalta ta unda esnan cu ta vota MEP, ta prefera un coalicion cu POR, y pa partido POR, ta prefera forma cu MEP. Pa AVP, ta prefera traha cu MAS si mester forma coalicion. 

PARTIDO MAS POPULAR

E seccion mas popular atrobe, ta esun unda cu hende sa pa cua partido nan ta bay vota. Aki un biaha mas partido MEP ta tuma e liderazgo cu 41% di e cantidad, sigui pa 16% pa e grupo cu 'ainda no sa pa ken nan vota'. Despues ta sigui AVP cu 15%, y POR cu 10%. E tresnan cu ta mustra menos popular ta CURPA (0%), y MAS y UPP/PPA cu 1%. RED y RAIZ respectivamente tin 6 y 4%. Pero tambe tin e grupo cu ta 'otro', cu no kier bisa, ta na 5%. 

MAS INFORMACION

Den e encuesta aki, tabatin mas homber cu muher cu a participa. E cantidad di homber tabata 56% vs 44% cu tabata muher. E edad di mas cu a vota tabata entre 35-39 aña sigui pa 40-44 aña. Tambe esnan cu a participa, mayoria tabata na Noord (24.6%) y esun cu tabatin menos participacion, tabata atrobe San Nicolas cu 2.8%. 

GRADICIMENTO

NoticiaCla y Doc Opleidingen kier a gradici tur esnan cu a participa, y corda un y tur cu e informacion aki, mientras interesante, mester wordo usa responsablemente. Esta cu mester tene tur factor den consideracion. Wak e resultado completo AKI. 

 

  • Oduber: Situacion bergonzoso riba beach entre operadornan no lo wordo acepta

    Oduber: Situacion bergonzoso riba beach entre operadornan no lo wordo acepta

    ORANJESTAD – E situacion bergonsoso riba beach entre operadornan (manera por a mira riba video riba rednan social e dianan aki) no lo wordo acepta . Asina minister di infrastructura Otmar Oduber a laga sa pa medio di un comunicado. Segun e mandatario, e maneho di ‘3 strikes you’re out’ ta activo y lo tin cero tolerancia pa actonan asina.

  • Ex minister Sevinger na minister Oduber: ‘I don’t give a damn’!

    Ex minister Sevinger na minister Oduber: ‘I don’t give a damn’!

    ORANJESTAD – Durante su disertacion awe mainta den e reunion publico pa trata e proyecto di Green Corridor y Watty Vos Boulevard, ex minister responsabel pa e proyecto esta Benny Sevinger a declara cu e ta orguyoso di e trabou cu su team e tempo ey a haci pa e proyecto y cu e forma con a anda cu e proyecto tabata corecto. Ademas a cuestiona e forma con actual minister encarga cu e proyecto, Otmar Oduber kier resolve e problema, cu ta busca mas placa pa caba esaki. Pero loke mas a hala atencion, tabata e declaracion final di e ex minister, unda cu el a bisa cu kico cu e minister actual kier haci, ‘Be my guest.. pasobra I don’t give a damn! ”. Un declaracion cu rapidamente a bira e palabra di dia, tanto den Parlamento como riba rednan social. 

  • Aruba investigando informacion di articulo di Trouw riba contrabanda Venezolano

    Aruba investigando informacion di articulo di Trouw riba contrabanda Venezolano

    CARACAS/ORANJESTAD – Oro y diamanta for di Venezuela ta wordo transporta di contrabanda pa Corsou y Aruba na gran escala, y facilita pa ehercito Venezolano. Asina e corant Hulandes Trouw ta raporta den su edicion awe. E informacion cu periodistanan di e corant a haya, ta bin di ex general Cliver Alcalá. Prome minister Evelyn Wever den su prome reaccion awe riba e articulo a bisa di tabata na altura di e articulo en cuestiony cu mesora el a manda investiga si esaki ta conta enberdad pa Aruba, ya cu segun e articulo e enfoke tabata Corsou y no tanto Aruba. For di fuentenan gubernamental Venezolano, NoticiaCla a haya un reaccion inoficial indicando cu no ta duna mucho balor na e informacion ya cu Alcala ta conoci di ta un persona ‘malo’, osea no di confia. Mientrastanto, fuentenan periodistico di e portal aki ta mustra cu mientras cu e ex general tabata hopi cerca di ex presidente Chavez, el a distancia di Maduro pasobra e tabata critica hopi di su politica. Pues e reaccion di parti di fuentenan di gobierno, ta comprondible e ora. E articulo mes en cuestion ta di e periodista investigativo Bram Ebus, cu a haci un investigacion di e asunto aki. E ta bin na remarke net awor cu tin un impasse entre Aruba y Venezuela pa contrabanda di hopi material cu Venezuela tin problema cune. Ta netamente pa e asuntonan aki, Venezuela tin su frontera cu islanan ABC cera pa mas di un siman caba. Segun e presidente di e pais andino, Nicolas Maduro, e problema ta contrabanda di mafia. Diahuebs tin combersacionnan atrobe pa wak si ta sali di e impasse aki y si Venezuela ta dispuesto pa firma e acuerdo di concepto yega na dje diabierna anochi. Fuente: Trouw.nl.. foto cortesia REUTERS. 

  • Tin solucion pa reduci e ‘presion’ na Spoed Eisend Hulp

    Tin solucion pa reduci e ‘presion’ na Spoed Eisend Hulp

    ORANJESTAD – E introduccion di dos docter di cas extra na Spoed Eisend Hulp mester yuda reduci e tempo di espera ora cu un pashent ta na e departamento ey di hospital. Asina minister di Salud Dangui Oduber a bisa dialuna mainta den un conferencia di prensa. Segun Oduber, tin dos localidad habri na hospital unda cu AZV lo cubri dos huisarts cu ta specialmente atende y asisti tur caso di emergencia. E pashent cu yega, lo wordo trata. Esun cu resulta di no ta emergencia, e 2 docternan di cas lo trata. Asina e mandatario lo kier baha presion riba SHE, y reduci tempo cu pashent ta warda pa ayudo medico. Awor ta buscando si tin docter di cas disponibel cu por cuminsa di biaha, y si ta pa e minister, esaki por cuminsa dentro di un luna caba. “Pero por lo menos ya tin palabracion entre hospital i AZV pa cubri e gastonan” Oduber a bisa.

  • Wever: Integriteitskamer ta realidad prome cu fin di 2018

    Wever: Integriteitskamer ta realidad prome cu fin di 2018

    ORANJESTAD – Ta e intencion pa durante e prome aña di gobernacion Wever Croes, introduci e asina yama ‘integriteitskamer’ osea e ‘camber di integridad’. E camber aki tin cu scrutina tur proyecto y asunto di gobierno pa sigura cu esaki ta cumpli cu tur norma di integridad. Asina prome minister Evelyn Wever Croes a bisa dialuna durante conferencia di prensa. E structura di e camber aki sinembargo ta hopi curu ainda. E unico cos cu ta sigur, ta cu e ta bin e aña aki ainda, y cu e ta consisti di un grupo di persona ‘no politico’, sino e ta ‘beat the whole purpose’.

  • Gobierno a lamenta cu CITGO Aruba a nenga parlamentarionan Hulandes informacion

    Gobierno a lamenta cu CITGO Aruba a nenga parlamentarionan Hulandes informacion

    ORANJESTAD - Gobierno di Aruba ta lamenta cu Citgo Aruba a nenga informacion na parlamentarionan Hulandes. Esaki tabata e reaccion official un dia despues cu dos parlamentario Hulandes a reclama publicamente cu nan no a haya informacion di e refineria y a wordo prohibi entrada. Ta trata di parlamentarionan Hulandes van Raak y Bosman cu tabata na Aruba siman pasa pa atende reunionnan interparlamentario entre Aruba Hulanda y Sint Maarten. Pa cu e reunion aki e delegacion Hulandes a pidi Parlamento di Aruba pa por regla un bishita na refineria of por lo menos pa Citgo duna un presentacion na Parlamento. Lamentablemente Citgo a nenga di haci esaki, y e dos Parlamentarionan a bay busca informacion nan mes. Nan a bay na e refineria y locual nan a mira a decepciona nan. Nan a mira hopi hero bieu, y nan no a mira practicamente ningun actividad. Riba medionan social nan a cuestiona esaki masha hopi mes y un video di sr. van Raak “locual mi no tabata mag di wak na Aruba” a circula den henter Reino. A puntra Prome Minister di Aruba su reaccion, y sra. Wever-Croes a indica cu e ta lamenta cu Citgo no a duna e Parlamentarionan informacion tocante e proyecto. Pa gobierno tambe aparentemente ta dificil pa haya informacion. Tin reunionnan planea e siman cu ta bin pa haya mas informacion di e status di e proyecto. Mes momento Gobierno ta studiando e contractnan cu Gobierno di AVP a cera cu Citgo pa operacion di e refineria, pasobra indicacion ta cu e inversionnan no a tuma lugar y no tin claridad ki tempo nan lo tuma lugar. Gobierno di Aruba a anuncia siman pasa caba cu a institui un comision independiente pa studia e contract y conseha Gobierno kico pa haci cu n’e. Foto cortesia di gobierno su oficina di prensa.   

  • Powered by SETAR