Hopi hende a bishita Expo Labor 2017 diasabra

Posted on 08/21/2017 11:06 pm AST | Updated on 08/22/2017 3:45 am AST

ORANJESTAD - Diasabra ultimo desde oranan trempan di mainta comision organisado di Expo Labor 2017 a ricibi varios persona cu ya caba tabata na Renaissance Convention Center. Nan meta tabata pa informa nan mes di tur posibilidad di trabou y busca informacion di con nan por progresa riba mercado laboral.

Minister di Labor Angel Bermudez tabata sumamente contento y satisfecho cu e resultado y e gran participacion na e evento aki. Durante su discurso na Expo Labor 2017, e mandatario a splica detayadamente algun mehoracion cu mester tuma luga riba tereno di labor.

“Mi ta haci tur empeño pa haya control di e materia aki, pero mi tin cu admiti cu e no ta facil”, asina Bermudez a expresa diasabra mainta. Segun e mandatario, tin necesidad pa e departamentonan concerni relaciona cu otro miho pa asina defini un maneho di labor efectivo. Ademas, e mandatario a papia tambe riba e aspecto di digitalisacion pa simplifica henter e proceso laboral.

“Mi ta mira centenares di inscripcion na DPL. E cifranan aki poco poco ta bahando, pero nos mester por hiba un maneho mas efectivo y e datonan mester wordo acopla na otro”, asina Minister Bermudez a indica.

Na mes momento e mandatario a splica cu e la bin ta constata cu tin incompatibilidad entre e capacidad di hende y hobennan desemplea y e exigencianan di varios vacatura cu tin actualmente riba mercado laboral. Specialmente den cierto ofishi, no tin suficiente solicitud pa cubri e demanda cu tin actualmente den nos economia.

E funcionnan aki cu ta paga sueldo minimo, no ta un incentivo pa e grupo desemplea drenta mercado laboral. Sin embargo Bermudez ta considera cu e ta un prioridad pa e generacion hoben participa den e proceso laboral. Ademas, cu departamento di enseñansa hunto cu dunadoran di trabou por haci un gran aporte na e problematica aki.

Bermudez a indica cu despues di expo labor e ta sumamente importante pa e comision realisa un estudio ‘follow up’ y tambe un encuesta pa por midi e resultado y efectividad di e evento aki. Pues den e dianan binidero e trabounan lo continua pa yega na un miho analisis di e aporte di Expo Labor 2017 na e situacion actual di nos mercado laboral y desempleo.

  • Zulo
  • Powered by SETAR