ORANJESTAD – Tormenta tropical Harvey lo pasa panort di Aruba entre diasabra atardi pa diadomingo marduga. Segun servicio meteorologico di Aruba, mirando su direccion (panort di Aruba), lo no emiti ningun alerta (watch) durante su pasada. E tormenta a nace awe merdia y su centro tabata 13.0 grado nort y 55.8 grado west. Un tormenta tropical debil, 400 km oost di Barbados.
AWACERO
Ta spera entre 5 pa 15 mm di awacero, pero localmente mas anochi di diasabra pa diadomingo mainta. Autoridad local y ciudadanonan di Aruba mester monitoria e progreso di e sistema aki.
ORANJESTAD - E asamblea general di Nacionnan Uni a proclama 22 di april como Dia Internacional di Mama Tera. Esaki, nan a haci’e pa medio di un resolucion firma na 2009. E fecha aki ta reconoce e ecosistemanan di e planeta Tera, cu ta e luga di biba di humanidad y cu mester di proteccion pa asina engrandece hende su bienestar, combati cambio di clima y tambe stop e biodiversidad di bay perdi. Aki na Aruba DNM tambe ta reconoce e urgencia pa haci mas y duna un voz na e naturalesa, Mama Tera.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.