ORANJESTAD - Den e luna di april 2017, e cantidad di placa den circulacion a baha cu Afl. 43.1 miyon te na Afl. 4.137,8 miyon, compara cu maart 2017. Esaki a resulta door di menos reserva di divisa netto (-Afl. 25,2 miyon) y activo domestico netto (-Afl. 17,9 miyon). Asina Banco Central di Aruba (BCA) ta raporta den un comunicado. Segun e comunicado, E bahada den e activo domestico netto a surgi door cu transaccionnan no relata na credito (-Afl. 11,2miyon) y credito domestico a mengua (-Afl. 6,8 miyon). E caida den transaccionnan no relata na credito a wordo causa principalmente door di subidanan den e asina yama “shareholders’ equity” y “accounts receivable and prepayments” y “other liabilities” y tambe transaccionan di clearing. Credito domestico a disminui door di menos credito bancario netto na e sector publico (-Afl. 34,6 miyon), cual a wordo pa gran parti neutralisa pa un crecemento den credito bancario na e sector priva (+Afl. 27,9 miyon).
E bahada den credito bancario netto na e sector publico ta relaciona principalmente cu un subida den depositonan di gobierno (+Afl. 131,4 miyon) cu a surgi door cu gobierno a saca bono (+Afl. 125,0 miyon). E expansion den credito na e sector priva (+Afl. 27,9 miyon) a resulta for di mas credito na empresa (+Afl. 17,4 miyon), mas hipoteca pa vivienda (+Afl. 6,0 miyon) y mas credito na consumidor (+Afl. 4,5 miyon).
E caida den e reserva di divisa netto di e sector bancario (-Afl. 25,2 miyon) ta debi na benta netto di divisa na publico (-Afl. 216,0 miyon), principalmente relaciona cu entrada for di importacion di mercancia, otro servicionan y e asina jama ‘income account’. Esaki a wordo mitiga pa un gran parti pa compra netto di divisa for di publico (+Afl. 190,7 miyon), primordialmente relaciona cu entrada for di turismo, transferencia netto pa cuentanan den exterior di companianan local y servicio di transportacion.
INFLACION
E nivel general di prijs, cu ta wordo midi door di e indice di prijs di consumo, a registra un bahada di 0,1 porciento den e luna di April 2017, compara cu april 2016. E contribuyente principal na e caida aki ta e componente “Vivienda”, cual ta debi primordialmente na un reduccion den prijs di electricidad. Di otro banda, e componentenan “Transporte”, “Cuminda y bebida no-alcoholico”, “Educacion” y “Restaurant y Hotel” a registra un subida. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,5 porciento compara cu April 2016. Pa loke ta trata e promedio anual di e tasa di inflacion, esaki a registra un bahada di 0,6 porciento na april 2017, compara cu un caida di 0.7 porciento na maart 2017.
TURISMO
Na April 2017, e cantidad di turista a registra 96.915 bishitante, cual tabata 1,9 porciento (-1.908 bishitante) menos cu na April 2016. Esaki a resulta principalmente door di 40,4 porciento (-11.394 bishitante) menos turista for di Latino America (-11.394 bishitante). Di otro banda, e mercado Norte Americano a crece cu 13,9 porciento (+8.527 bishitante). E caida den e mercado Latino Americano a wordo causa pa menos bishitante for di Venezuela (-13.828 bishitante of -63,9 porciento). E crecemento den e mercado Norte Americano a resulta for di un expansion den bishitante for di Merca (+7.657 bishitante of 13,1 porciento). E cantidad di turista crucero a registra un subida di 12.642 bishitante of 25,0 porciento te na 63.221 na april 2017, compara cu april 2016. E cantidad di barconan a expande for di 26 na april 2016 pa 28 na april 2017.
ENTRADA DI GOBIERNO
Na april 2017, entrada di gobierno a suma Afl. 73,6 miyon, cual ta Afl. 13,2 miyon menos compara cu e mesun luna di e aña anterior. E bahada aki a resulta di un caida den entrada di impuesto (-Afl. 13,8 miyon) y un subida den entrada no relata na impuesto (+Afl. 0,8 miyon). E bahada den entrada di impuesto ta relata principalmente na menos impuesto riba ganashi (-Afl. 8,0 miyon), e asina yama “overdrachtsbelasting” (-Afl. 4,6 miyon), menos accijns riba cerbes (-Afl. 1.2 miyon) y impuesto riba entrada (-Afl. 1,1 miyon). Di otro banda, crecemento a wordo registra den entrada di impuesto riba importacion (+Afl. 1,0 miyon) y benta di negoshi (B.B.O) (+Afl. 0,9 miyon).
ORANJESTAD - Den e prome kwartaal di 2024, por spera cifranan prometedor y solido pa turismo como e pilar di entrada primordial y di suma importancia pa economía di Aruba. Asina e oficina di turismo di Aruba ATA ta raporta diahuebs. A.T.A. ta pone hopi enfasis riba e modelo di “High Value-Low Impact” cu ta para pa un balans entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.
ORANJESTAD – Diahuebs 14 di maart, Minister di Turismo y Salud Publico Sr. Dangui Oduber a ricibi un invitacion pa bishita Aruba Boutique and Art Hotel cu lo habri nan porta dia 1 di April 2024. Un boutique hotel nobo den curason di Palm Beach cu lo forma parti como miembro di e marca Best Western Signature Collection.
ORANJESTAD – Diaranson mainta 27 di maart Prome Minister Evelyn Wever-Croes hunto cu colega Minister di Finansa Xiomara Maduro a biaha pa Corsou pa reunionan importante den cuadro di e tema di ENNIA.
MIAMI – E compania hotelero Four Seasons awor tambe ta sigui e trend di e compania Ritz-Carlton cu a inicia cu nan coleccion di yate luhoso estilo crucero. E compania a anuncia cu nan tambe ta drenta den e negoshi ey, di ‘espacio di crucero luhoso ultra chikito, cu su prome yate den construccion na Italia. E prome destinacionan ta conoci y ta pa Caribe, cuminsando na 2026. E temporada Caribense lo core di januari pa maart 2026 cu parada na St Barth, Nevis, the Grenadines, Saint Lucia, Barbados, Martinique, Curacao, Aruba y Guadeloupe. Cada bapor lo tin solamente 95 suites, cu ta 50% mas espacio pa persona cu cualkier otro crucero. Cada camber lo tin bentanan gigante di vloer te plafond, hopi vanidad den e bañonan y terras priva. Asina e presidente y CEO di Four Seasons Alejandro Reyna a sigura.
ORANJESTAD – CEO di Aruba Hotel & Tourism Association Tisa LaSorte, recientemente durante e programa Noticiacla LIVE a pidi pa hende na Aruba no bay protesta contra turista na Aruba riba e desaroyo di turismo. Den e video, e ta splica e peticion mas amplio.