E di 4 edicion Aruba Love Festival cu 19 DJ internacional

E di 4 edicion Aruba Love Festival cu 19 DJ internacional

Posted on 08/12/2017 3:40 pm AST | Updated on 08/13/2017 11:15 pm AST

ORANJESTAD – E di 4 edicion di Aruba Love Festival ta prome siman di november. Asina organisadornan hunto cu Aruba Tourism Authority y patrocinadornan a informa diabierna ultimo. Segun e organisadornan, den su di cuater edicion, Love Festival ta crece atrobe y ta comberti den un festival di bon musica, bon energia y bon experencianan durante un total di cinco dia den luna di november proximo.

INTERNACIONAL

For di inicio, e plan maestro di Love Festival tabata pa den termino di cinco aña ubica e evento na un escala y plataforma internacional; y ta logrando esey tambe. Love Festival ta keda adapta su concepto pa asina participantenan biba e experiencia musical, pero tambe conoce nos isla y su atractivonan natural y cultural. Pa e motibo ey, for di aña pasa, Love Festival ta pone celebracion di Carnaval den enfoke principal, y e aña aki ta bay na e siguiente nivel.

ATA

Aruba Tourism Authority ta comparti e obhetivo di e organisadornan y p'esey for di aña pasa a uni forsa pa realisa e esfuersonan cu ta atrae un mercado nobo y cu gran poder di compra pa nos isla. E ekipo di Love Festival di su banda, ta percura pa cumpli cu tur expectativa pa loke ta trata organisacion, ehecucion y resultado. Ta esencial, y a demostra esaki den pasado, cu ta tene debido cuenta cu seguridad y limpiesa, entre otro aspectonan. E aña aki no lo ta diferencia tampoco. Mester bisa danki tambe na nos publico ya cu semper tabatin un comportacion ehemplar.

CARIBBEAN AREA

Pa 2017, Love Festival ta introduci su ‘Caribbean Area’, adicional na e stage di ‘Love’ y ‘Tech’. Den e Caribbean Area, Love Festival ta bay presenta un repertorio di DJ y agrupacion nan local pa duna e festival un toke mas crioyo y complace asina nos smaak diverso den generonan musical. Nos talentonan local tin e oportunidad di hala atencion di ehecutivonan musical di exterior cu semper ta presente. Den e mesun espacio aki tambe Love Festival ta busca pa traha cu gruponan di Carnaval cu por exhibi nan tema pa 2018 y tambe registra participantenan. Tambe lo tin un Entertainment Zone y un Food Village pa completa e experiencia.

FECHA

Love Festival 2017 lo tuma luga entre diaranson 1 pa diadomingo 5 di november proximo na un localidad cu pronto lo keda anuncia. Adicional na e anochinan di festival, tin varios pool party y otro actividadnan destina pa mustra nos isla na e bishitantenan. Entradanan ya ta obtenibel y ta conseha un y tur pa probecha pa e ofertanan cu tin pa esnan cu cumpra trempan. Disfruta di mas di 19 DJ internacional, 10 DJ local y 6 banda musical. Love Festival ta keda encurasha su dress code blanco, pero expresando bo individualidad cu un toke Carnavalesco.

  • Powered by SETAR