KVK : Decision aumento salario minimo no tabata transparente

KVK : Decision aumento salario minimo no tabata transparente

Posted on 08/11/2017 5:55 pm AST | Updated on 08/11/2017 7:48 pm AST

ORANJESTAD – Despues cu ATIA a vocifera nan disgusto riba e hecho cu no a participa na nan cu lo tin un aumento di salario minimo, Camara di Comercio (KVK) tabata otro gremio cu a participa esaki na comunidad. E aumento di salario minimo a keda publica e siman aki  den diferente medio di prensa cu desde 1 augustus ultimo a ahusta e salario minimo. E decision aki ta uno cu Camara di Comercio y Industria (KvK) ta haya cuestionabel mirando cu tin diferente aspecto cu no a tene cuenta cu ne prome cu yega na un decision di e magnitud aki y riba dje haci un anuncio mas di un siman despues cu e ahuste lo mester drenta na vigor.

KvK kier mira claridad den e decision aki y ta haya falta di un base solido ariba cua e ahuste aki ta basa. Un aumento di 2% di e salario minimo ta considerablemente halto, mirando cu inflacion na 2016 tabata di 0.9% y pues e aumento ta sobrepasa un posibel necesidad urgente pa hisa e salario minimo na e momento aki. E inflacion actual no ta di e volumen cu ta rekeri un ahuste di e salario minimo den e forma cu esaki a wordo ehecuta.

Consecuencia di e ahuste por hiba na un situacion caminda cu e prijs di producto y servicionan tambe lo mira un aumento mirando cu e comerciante lo hay'e cu mas gasto cu ta resultado di hisa e salario minimo. No ta solamente e salario minimo e lo tin cu ahusta pa su empleadonan, pero tambe compensacion y debernan mara na e salario manera AZV, AOV/AWW.

KvK ta lamenta cu no a brinda KvK e oportunidad pa discuti e topico di salario minimo y pa evalua e decision aki ni tampoco a wordo informa di antemano riba ningun detaye di e aumento di salario minimo. Di e forma aki, sector priva ta haya nan mes cu extra gastonan sin cu nan ta debidamente prepara pa esaki.

E momento cu a scoge pa introduci e ahuste aki tampoco tabata esun di mas apropia. E fecha di 1 augustus 2017, cual ya a vence y no ta duna e comerciante e espacio pa ahusta nan presupuesto y pa asina por ta prepara. E comerciante awor ta haya su mes confronta cu gastonan inespera. Entre e salario minimo y e prijs di producto tin un interaccion ta existi caminda cu e salario minimo ta afecta e prijs pa e comerciante por cubri su gastonan y ainda por haci ganashi. E comerciante ta haya menos y awor su gasto ta subi tambe. Hisa e salario minimo sigur ta trece mas peso riba e comerciante y e gastonan cu e tin cu cumpli cu ne pa e por haci su negoshi.

KvK ta dispuesto pa sinta y discuti e topico aki cu e Ministerio concerni y ta spera di por mira reaccion di parti di SER (Social Economische Raad) riba e ahuste di salario minimo aki. Nos ta hopi consciente cu nos ta den tempo di eleccion y un cambio den nos mecanismo economico di e forma aki no ta e forma mas prudente pa gana simpatia di e votador.

  • Cruise fever.net ta scoge Aruba den top 10 di waf turistico

    Cruise fever.net ta scoge Aruba den top 10 di waf turistico

    ORANJESTAD – Aruba ta den e top 10 di waf crusero den Caribe. E portal Cruisfever.net a pidi su lectornan (cu ta amante ferviente di crusero) pa scoge nan waf crusero faborito den Caribe, pa e di 5 premio annual di Cruise Fever pa 2017. Aruba a resulta number 10, y St Maarten (prome cu e horcan Irma) a resulta e ganador absoluto. E otronan cu ta presidi Aruba ta Roatan (Honduras), St Kitts, Barbados, Grand Turk, San Juan, Cozumel, Grand Cayman y St Thomas. Lesa e articulo completo AKI. 

  • Caribbean Journal: Hilton y Renaissance entre top 5 hotelnan di Aruba

    Caribbean Journal: Hilton y Renaissance entre top 5 hotelnan di Aruba

    ORANJESTAD – Aruba Hilton y Aruba Renaissance hotel ta entre e 5 miho hotelnan di Aruba segun e portal renombra Caribbean Journal. E portal ta enfoca riba turismo den Caribe y ta haci sondeo y encuesta y ta publica resultadonan hopi biaha di e miho beachnan, hotel, restaurant etc. Y hopi biaha Aruba su productonan turistico ta resalta. Aruba tin hopi hotel, pero 5 so a ‘make the cut’ e biaha aki segun Caribbean Journal. E otro tres hotelnan di Aruba ta Bucuti/Tara Beach, Marriott y Ritz Carlton.

  • Corte ta otorga double e pakete di retiro na 10 trahado di Universal Aviation

    Corte ta otorga double e pakete di retiro na 10 trahado di Universal Aviation

    ORANJESTAD – E compania Universal Aviation mester paga un total di 10 trahado 2 biaha e suma di pakete di retiro inicialmente ofreci. Asina corte a dicta den un sentencia e siman aki cu e 10 trahadornan a entama contra e compania su director. Manera ta conoci, e compania ta cera su portanan fin di luna aki, ya cu e compania no a participa na e destaho publico pa opera e facilidad den futuro riba tereno di aeropuerto. Como tal e compania no tin entrada mas despues di e fecha ey. Esey ta pone cu despues di fin di luna e compania ta stop di existi, poniendo cu nan mester retira tur nan trahadornan den servicio. Di e 26 trahadornan, 16 a acepta e pakete di retiro inicial ofreci, y 10 a opta pa acudi na abogado David Kock pa bringa nan caso. Pa sorpresa di e compania, Kock a logra pues redobla e suma di pakete di retiro pa su 10 clientenan. 

  • Camara di Comercio a eligi algun miembro nobo pa directiva

    Camara di Comercio a eligi algun miembro nobo pa directiva

    ORANJESTAD – Camara di Comercio a haya algun miembro nobo di directiva awe. Despues di e eleccion awe mainta pa dos miembro pa ‘grootbedrijf’ y uno pa ‘kleinbedrijf’, a bira conoci kendenan a keda eligi. Ta trata di veterano comerciante Satish Daryanani, conocido comerciante Wanda Broeksema cu a keda eligi pa grootbedrijf, mientras cu e ‘new kid on the block’, Alexlindy Croes a keda eligi pa forma parti di e directiva pa kleinbedrijf.

  • Rehabilitacion refineria CITGO Aruba coriendo retraso di 6 pa 9 luna

    Rehabilitacion refineria CITGO Aruba coriendo retraso di 6 pa 9 luna

    ORANJESTAD – E proceso di rehabilitacion di e refineria CITGO a acumula un retraso basta grandi, pero ainda Refineria di Aruba (RDA), compania doño di e refineria, tin speranza cu e refineria por cuminsa opera (startup) 1 di October 2020. Segun CEO y presidente di RDA Alvin Koolman, CITGO Aruba ta mara contractualmente cu pa e fecha ey e mester ta operacional, sino tin un kiebra di contracto (breach of contract). No obstante esey, tin un retraso di entre 6 pa 9 luna pa loke ta e trabaonan di rehabilitacion, si no ta mas, cu ta pone cu e prome ‘fase’ di rehabilitacion por cuminsa te mitar di 2019, y e ultimo parti 2 luna despues. Esaki contrario na e 18 pa 24 luna cu a pone pa e ‘fasenan’ di rehabilitacion cuminsa despues cu a firma e acuerdo na October 2016.

  • ASTEC: Carga lo ta na tempo si barconan tene nan mes na reservacion

    ASTEC: Carga lo ta na tempo si barconan tene nan mes na reservacion

    ORANJESTAD - “Pa nos tur agencia ta mesun importante, tur barco ta mes importante y tur carga ta importante pa esun cu ta importe, pesey pa nos ta dificil haci distincion of discrimina un barco riba e otro”, asina Tito Tromp, gerente di operacion di ASTEC a duna di conoce den un comunicado diamars. E ta referi na e criticanan den media for di siman pasa caba, ora cu barconan di carga no por a mara. El a enfatisa cu e barconan a yega laat y no kier a warda nan turno, pues e problema sigur no tabata na waf!

  • Powered by SETAR