Update: Intento fracasa pa 3 latino drenta Aruba clandestino

Posted on 08/4/2017 8:11 pm AST | Updated on 08/5/2017 8:20 am AST

ORANJESTAD – Manera cu NoticiaCla a raporta inicialmente caba awe mainta. Wardacosta Aruba a haña melding cu ciudadanonan a topa dos (2) persona di habla spaño di cua unu levemente y e otro gravemente herida entre Boca Prins y Dos Playa.

Mesora unidadnan di Wardacosta, Polis di San Nicolas, Brandweer y Ambulance. Na e sitio, a bin topa cu e dos hombernan aki. Cu hopi esfuerso e cuerponan a logra saca un di e personanan cu tabata pega den e barancanan,  cual tabata gravemente herida.

Claramente por a mira cu aki ta trata di personanan cu a purba na drenta Aruba di un forma ilegal. E personanan aki a ser transporta cu urgencia cu e helicopter di Wardacosta, e AW-139 pa aeropuerto caminda ambulance a bin busca nan y transporta nan pa hospital pa nan por haña mas atencion medico.

Den un buskeda mas aleu di parti di Wardacosta den e barancanan caminda a saca un di e personanan, Wardacosta a bin topa un boei cu algun tas y saco mara na dje den cual tabatin droga y tambe tres arma. Hunto cu Polis di San Nicolas a bay over na detencion di e sospechosonan y a confisca e droga y armanan. E sospechosonan y tambe e droga a ser entrega na e departamento di UGC (Unit Georganiseerde Criminaliteit) cu lo continua cu e investigacion.

Mas den careda di 11or Wardacosta a haña melding di un curpa sin bida cu a ser señala den e mesun area ariba menciona. Ta trata di un persona masculino di aspecto latino. E curpa a ser confisca door di Polis cu lo continua cu mas investigacion.

 

  • Aruba ta registra su di dos morto den trafico pa 2017

    Aruba ta registra su di dos morto den trafico pa 2017

    ORANJESTAD – Aruba a registra su di dos morto den trafico pa 2017. Awe diasabra madruga pa mas o menos 4:20 yamada ta drenta na central di polis cu na altura di cas Savaneta 314 un auto bayendo direccion ariba a bolter y pega candela. Na yegada di e patruya di polis ta bin topa cu e auto Yaris A - 62967 color blauw cla y cu tabata na candela. A pidi pa brandweer di biaha y ambulance. E pasahero a logra sali for di e auto pero e chauffeur si no a logra sali. Pa 5:30 dr Texier ta constata morto di Jonathan Joel DIRKSZ, naci na Aruba 13-2-93 .

  • OM: No a haya restonan di weso humano (den caso Holloway)

    OM: No a haya restonan di weso humano (den caso Holloway)

    ORANJESTAD – Ministerio publico a confirma e informacion di NoticiaCla di diaranson riba e caso ‘nobo’ di Holloway. Den un comunicado nan ta splica cu nan a tuma nota di e noticia cu a wordo publica e siman aki pa of den nomber di señor Dave Holloway, tata di Natalee Holloway. Posiblemente lo ta trata di restonan di wesonan humano, cu a wordo haya na Aruba y cu lo ta di interes relaciona cu desaparicion di Natalee Holloway.

  • Richardson: Top di polis lo conoce varios cambio otro luna

    Richardson: Top di polis lo conoce varios cambio otro luna

    ORANJESTAD – Comisario di polis Trudy Hassell ta bira e proximo hefe di Recherche, Vanessa Tjon-Kock ta bira e hefe di ‘Bijzondere Diensten’ y Irma Gordon a bira hefe di algemene diensten. Esey ta departamento uniforma. Asina Alto Comisario di polis Dolfi Richardson a confirma pa NoticiaCla diaranson atardi. Segun Richardson, ta un proceso cu e kier a haci for di 6 luna pasa, esta rouleer henter e top di polis. Y como tal ora cu a puntr'e riba e informacion cu a keda publica den e matutino Awe Mainta, ela confirma esaki pa e portal aki. “Nan tabata sa di esaki, pero nan no tabata sa cua departamento nan lo a bay” Richardson a bisa.

  • Polis investigando si homber haya mara ta posibel atraco na Playa

    Polis investigando si homber haya mara ta posibel atraco na Playa

    ORANJESTAD – Den loke ta parce un atraco (segun vocero di polis Lito Lacle no por defini ainda si tabata un atraco of no), hombernan lo a ‘tie rap’ e homber y te ainda e no falta nada y e no sa ken a haci’e. Ela sosode banda di Diana's Fine Jewelry! Centrale Post mientrastanto a manda recherche districto Oranjestad na e sitio.

  • Despues di persecucion, polis a gara homber arma marduga

    Despues di persecucion, polis a gara homber arma marduga

    ORANJESTAD – Awe marduga 04.25 melding a drenta via CP cu tin un mucha homber bruin cortico cu un arma di candela dilanti Bar A Bar. Asina vocero di polis Lito Lacle a confirma pa NoticiaCla. Patruya di polis a bay na e sitio y na nan yegada un persona a core bay. Durante persecucion polis a logra detene y tambe a tuma un arma di candela den beslag. E vocero no tabatin identificacion ainda di e sospechoso. Mesora a mustra tambe cu a haya un pistol preto cu ne. A bay Hospital cu e sospechoso, pero no ta conoci pakico a haci esaki.

  • Durante huiszoeking pa un caso, a gara 5 ilegal Venezolano na Ponton

    Durante huiszoeking pa un caso, a gara 5 ilegal Venezolano na Ponton

    ORANJESTAD – Awe marduga recherche Oranjestad a haci zoeking na un cas na Madiki enbusca di un sospechoso busca pa husticia J. H. pa un caso di tiramento. Asina vocero di polis Lito Lacle a confirma pa NoticiaCLa awe mainta. Na e cas a bin encontra varios articulo entre otro un brommer procedente di ladronicia, 5 ilegal Venezolano. No a encontra e sospechoso na e cas mes, pero a bin detene na un otro cas den Ponton. E 5 ilegalnan a wordo deteni pa mensenhandel/ Mensensmokkel y a transporta pa warda pa mas investigacion. Na e zoeking aki tambe fiscal tawata presente.

  • NoticiaCla Ad
  • Powered by SETAR