Schwengle: Pakico ta yuda Little League si y Poney League no

Schwengle: Pakico ta yuda Little League si y Poney League no

Posted on 07/17/2017 3:53 pm AST | Updated on 07/17/2017 11:47 pm AST

ORANJESTAD - Pa kita e discusion pakico ta yudando cierto organisacion y otronan no den deporte, e mandatario di deporte Alex Schwengle a splica esaki awe. Den e caso di Aruba Little League, debidamente nan a haya placa di Gobierno e aña aki. Dialuna merdia a amplia cuanto placa total a otorga e organisacion. Den e caso di Pony League, esey ta un organisacion priva cu no ta afilia ni na Little League y cu no ta registra na Subsidie Comissie pasobra no ta cumpli cu reglanan di ASU y COA.

SCENARIO

Segun e mandatario, ta algun dia caba cu algun federacion liga politicamente y otro politiconan ta purbando na crea un scenario den cual Gobierno no ta yuda organisacionnan deportivo pa biaha cu nan deportistanan den temporada di vakantie. Ta saca potret di muchanan bendiendo rifa canto di caminda den solo, pa uza esey pa critica maneho di Gobierno relaciona cu subsidio di instancianan deportivo.

KEN TA SUBSIDIA

Segun e mandatario, kisas hopi di e politiconan hoben no ta realisa cu Gobierno desde hopi aña caba no ta subsidia ningun organisacion directamente sino ta haci esey via "subsidie commissie" cu ta haya mayoria di su fondonan via Lotto pa Deporte y tambe via Gobierno. Cu un directiva consistiendo di expertonan riba tereno financiero, deportivo y legal, nan ta percura pa tur organisacion cu ta cumpli cu raporta nan gastonan, pa subsidia nan plannan di henter aña.

REKISITO

Un di e rekisitonan ta tambe cu mester ta inscribi na Aruba Sport Unie (ASU) y na Comite Olimpico Arubano (COA). Claro cu nan tin un lista di rekisitonan cu cada organisacion mester cumpli cu ne pa por bini na remarca pa haya subsidio. Un di nan ta cu mester hiba un administracion transparente, mester hunga weganan serio na Aruba mes prome cu bula bay hunga afo y asina por sigui menciona.

ENTIDAD HURIDICO

Un otro informacion ta, cu entrante dia 1 di januari 2018 ta comberti e comision di subsidio di Gobierno den un entidad huridico nobo, como un fundacion. Te cu awor nan tabata un comision, sin un identidad huridico, pero cu ta maneha miyones pa aña den nomber di Gobierno. Nan ta un comision independiente di politica, pa garantisa cu clubnan deportivo ta cumpli cu reglanan bon stipula pa ricibi subsidio.

 

  • Oduber: Situacion bergonzoso riba beach entre operadornan no lo wordo acepta

    Oduber: Situacion bergonzoso riba beach entre operadornan no lo wordo acepta

    ORANJESTAD – E situacion bergonsoso riba beach entre operadornan (manera por a mira riba video riba rednan social e dianan aki) no lo wordo acepta . Asina minister di infrastructura Otmar Oduber a laga sa pa medio di un comunicado. Segun e mandatario, e maneho di ‘3 strikes you’re out’ ta activo y lo tin cero tolerancia pa actonan asina.

  • Ex minister Sevinger na minister Oduber: ‘I don’t give a damn’!

    Ex minister Sevinger na minister Oduber: ‘I don’t give a damn’!

    ORANJESTAD – Durante su disertacion awe mainta den e reunion publico pa trata e proyecto di Green Corridor y Watty Vos Boulevard, ex minister responsabel pa e proyecto esta Benny Sevinger a declara cu e ta orguyoso di e trabou cu su team e tempo ey a haci pa e proyecto y cu e forma con a anda cu e proyecto tabata corecto. Ademas a cuestiona e forma con actual minister encarga cu e proyecto, Otmar Oduber kier resolve e problema, cu ta busca mas placa pa caba esaki. Pero loke mas a hala atencion, tabata e declaracion final di e ex minister, unda cu el a bisa cu kico cu e minister actual kier haci, ‘Be my guest.. pasobra I don’t give a damn! ”. Un declaracion cu rapidamente a bira e palabra di dia, tanto den Parlamento como riba rednan social. 

  • Aruba investigando informacion di articulo di Trouw riba contrabanda Venezolano

    Aruba investigando informacion di articulo di Trouw riba contrabanda Venezolano

    CARACAS/ORANJESTAD – Oro y diamanta for di Venezuela ta wordo transporta di contrabanda pa Corsou y Aruba na gran escala, y facilita pa ehercito Venezolano. Asina e corant Hulandes Trouw ta raporta den su edicion awe. E informacion cu periodistanan di e corant a haya, ta bin di ex general Cliver Alcalá. Prome minister Evelyn Wever den su prome reaccion awe riba e articulo a bisa di tabata na altura di e articulo en cuestiony cu mesora el a manda investiga si esaki ta conta enberdad pa Aruba, ya cu segun e articulo e enfoke tabata Corsou y no tanto Aruba. For di fuentenan gubernamental Venezolano, NoticiaCla a haya un reaccion inoficial indicando cu no ta duna mucho balor na e informacion ya cu Alcala ta conoci di ta un persona ‘malo’, osea no di confia. Mientrastanto, fuentenan periodistico di e portal aki ta mustra cu mientras cu e ex general tabata hopi cerca di ex presidente Chavez, el a distancia di Maduro pasobra e tabata critica hopi di su politica. Pues e reaccion di parti di fuentenan di gobierno, ta comprondible e ora. E articulo mes en cuestion ta di e periodista investigativo Bram Ebus, cu a haci un investigacion di e asunto aki. E ta bin na remarke net awor cu tin un impasse entre Aruba y Venezuela pa contrabanda di hopi material cu Venezuela tin problema cune. Ta netamente pa e asuntonan aki, Venezuela tin su frontera cu islanan ABC cera pa mas di un siman caba. Segun e presidente di e pais andino, Nicolas Maduro, e problema ta contrabanda di mafia. Diahuebs tin combersacionnan atrobe pa wak si ta sali di e impasse aki y si Venezuela ta dispuesto pa firma e acuerdo di concepto yega na dje diabierna anochi. Fuente: Trouw.nl.. foto cortesia REUTERS. 

  • Tin solucion pa reduci e ‘presion’ na Spoed Eisend Hulp

    Tin solucion pa reduci e ‘presion’ na Spoed Eisend Hulp

    ORANJESTAD – E introduccion di dos docter di cas extra na Spoed Eisend Hulp mester yuda reduci e tempo di espera ora cu un pashent ta na e departamento ey di hospital. Asina minister di Salud Dangui Oduber a bisa dialuna mainta den un conferencia di prensa. Segun Oduber, tin dos localidad habri na hospital unda cu AZV lo cubri dos huisarts cu ta specialmente atende y asisti tur caso di emergencia. E pashent cu yega, lo wordo trata. Esun cu resulta di no ta emergencia, e 2 docternan di cas lo trata. Asina e mandatario lo kier baha presion riba SHE, y reduci tempo cu pashent ta warda pa ayudo medico. Awor ta buscando si tin docter di cas disponibel cu por cuminsa di biaha, y si ta pa e minister, esaki por cuminsa dentro di un luna caba. “Pero por lo menos ya tin palabracion entre hospital i AZV pa cubri e gastonan” Oduber a bisa.

  • Wever: Integriteitskamer ta realidad prome cu fin di 2018

    Wever: Integriteitskamer ta realidad prome cu fin di 2018

    ORANJESTAD – Ta e intencion pa durante e prome aña di gobernacion Wever Croes, introduci e asina yama ‘integriteitskamer’ osea e ‘camber di integridad’. E camber aki tin cu scrutina tur proyecto y asunto di gobierno pa sigura cu esaki ta cumpli cu tur norma di integridad. Asina prome minister Evelyn Wever Croes a bisa dialuna durante conferencia di prensa. E structura di e camber aki sinembargo ta hopi curu ainda. E unico cos cu ta sigur, ta cu e ta bin e aña aki ainda, y cu e ta consisti di un grupo di persona ‘no politico’, sino e ta ‘beat the whole purpose’.

  • Gobierno a lamenta cu CITGO Aruba a nenga parlamentarionan Hulandes informacion

    Gobierno a lamenta cu CITGO Aruba a nenga parlamentarionan Hulandes informacion

    ORANJESTAD - Gobierno di Aruba ta lamenta cu Citgo Aruba a nenga informacion na parlamentarionan Hulandes. Esaki tabata e reaccion official un dia despues cu dos parlamentario Hulandes a reclama publicamente cu nan no a haya informacion di e refineria y a wordo prohibi entrada. Ta trata di parlamentarionan Hulandes van Raak y Bosman cu tabata na Aruba siman pasa pa atende reunionnan interparlamentario entre Aruba Hulanda y Sint Maarten. Pa cu e reunion aki e delegacion Hulandes a pidi Parlamento di Aruba pa por regla un bishita na refineria of por lo menos pa Citgo duna un presentacion na Parlamento. Lamentablemente Citgo a nenga di haci esaki, y e dos Parlamentarionan a bay busca informacion nan mes. Nan a bay na e refineria y locual nan a mira a decepciona nan. Nan a mira hopi hero bieu, y nan no a mira practicamente ningun actividad. Riba medionan social nan a cuestiona esaki masha hopi mes y un video di sr. van Raak “locual mi no tabata mag di wak na Aruba” a circula den henter Reino. A puntra Prome Minister di Aruba su reaccion, y sra. Wever-Croes a indica cu e ta lamenta cu Citgo no a duna e Parlamentarionan informacion tocante e proyecto. Pa gobierno tambe aparentemente ta dificil pa haya informacion. Tin reunionnan planea e siman cu ta bin pa haya mas informacion di e status di e proyecto. Mes momento Gobierno ta studiando e contractnan cu Gobierno di AVP a cera cu Citgo pa operacion di e refineria, pasobra indicacion ta cu e inversionnan no a tuma lugar y no tin claridad ki tempo nan lo tuma lugar. Gobierno di Aruba a anuncia siman pasa caba cu a institui un comision independiente pa studia e contract y conseha Gobierno kico pa haci cu n’e. Foto cortesia di gobierno su oficina di prensa.   

  • Powered by SETAR