E ta oficial: AVP no ta participa den e debate pa millenials mayan
ORANJESTAD - E ta oficial. AVP no participa den e debate pa millenials mayan. Den un comunicado di e partido diaranson anochi manda via email, e partido berde a confirma e primicia di NoticiaCla di diamars anochi, esta cu e partido a opta pa no participa na e debate di millenials diahuebs. Segun e comunicado, organisacion 'Encuentro Politico Constructivo' a nenga participacion di mr. Gerlien Croes na e debate di y pa Millenials di diahuebs anochi. Un iniciativa cu e partido berde a haya un bon iniciativa y tabata hopi entusiasma pa su candidatonan millenial por defende e partido su vision y trabou.
E comunicado ta sigui bisa cu, 'E partido a propone pa mr. Gerlien Croes participa den e debate electoral organisa pa informa e asina yama grupo di 'millenials' cu un di nan candidato millenial cu ta parti di e team di AVP. Lamentablemente e organisacion a nenga participacion di mr. Croes y a exigi pa lider di partido ta esun cu mester participa. Y si no ta asina AVP lo ‘no ta welkom’ pa ta participe na e debate'. Segun e comunicado, den seno di partido a discuti e punto importante aki e siman cu a pasa y a tuma e desicion di hala atras e ora pasobra partido ta di opinion cu mr. Gerlien Croes y cada candidato riba lista di AVP ta igualmente capabel, pa splica y defende e vision di partido AVP na cualkier momento y riba cualkier plataforma. NoticiaCla ta pendiente un reaccion di e organisadornan di e debate proximamente awe nochi ainda.
A prolonga ciere di frontera cu Venezuela cu cuater luna mas
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.
Croes: Ta bay organisa un jobfair pa 45+ y penshonadonan
ORANJESTAD - Minister Glenbert Croes a anuncia cu pronto lo bay organisa un Jobfair specialmente pa pensionado y esnan di 45+. E categoria di edad aki unda tur comerciante y gremionan, hunto cu departamentonan di Labor esta DAO y DPL lo ta presente pa asisti y intermedia unda ta necesario.
Croes: Aruba mester di 9000 trahado e aña aki pa hotelnan nobo!
ORANJESTAD – Un declaracion cu minister di Labor Glenbert Croes a haci dialuna atardi via un comunicado di dje, a hala atencion den dialuna atardi relaciona cu e tema di labor den sector hotelero. Esaki pasobra e la declara den e comunicado textualmente cu ‘manera ya ta conoci, e aña aki lo tin 3000 camber di hotel adicional ta habri’. Pero e declaracion cu mas a hala atencion ta e hecho cu segun e mandatario “ Ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea”. Esey tambe ta un citado directo di e comunicado. Y e mandatario ta cita ‘ segun indicacion inicial’. Mester bisa si mesora cu e base di e comunicado tabata pa anuncia cu ta bay tin un job fair pa pensionado y persona di 45+. Y ta den e comunicado, e informacion ariba menciona ta aparece tambe.
Figaroa: Proximo gobierno mester consisti di solamente vakministers
ORANJESTAD – E lider politico hoben di e partido politico Direccion Politiea Leonardo Figaroa , ta pensa cu den e proximo gobierno, e lidernan politico di e partidonan den coalicion no mester bira minister sino bay den Parlamento. Y mester forma e gobierno cu solamente 7 minister y tur mester ta vakminister, esta no politico. Cu esaki, Leonardo ta pensa cu mester ‘kibra tradicion’.
Minister na Merca ta lobby cu banconan pa fia 160 miyon dollar
WASHINGTON – Minister di finanza di Aruba Xiomara Maduro a cuminsa lobby cu varios banco Mericano e siman aki, pa logra haya un fiansa di 160 miyon dollar. E mandatario a confirma cu e ta na Merca pa ‘atende e IMF Spring Meetings na Washington DC’, unda cu e ta ‘probecha pa reuni cu diferente banco pa por haci e preparacionnan necesario pa Aruba por subi mercado internacional pa por cubri e necesidad financiero di Aruba’. Algun di e banconan cu e mandatario a lobby cu ne pa purba haya fianza, ta JP Morgan, Standard Charter, Citi Group y Santander. Durante e lobbymento, e tin cu convence e institutonan financiero di tur loke ta pasa na Aruba y pa prueba cu Aruba tin un ‘stabilidad financiero cu ta brinda e confiansa na inversionista’. Segun e mandatario, e ta un suma cu ta wordo ‘refinancia’ di e debenan internacional existente cu ta madura. ‘ Como ta refinancia, esaki no lo crece e debe di Pais Aruba’, e mandatario a sigura bisando.
Wever: Fin di di dos cuartaal 2024, centro di Oranjestad ta haya mas luz
ORANJESTAD - Despues di e instalacion inicial di 50 luz aña pasa, ta intensifica e esfuerso pa mehora e visibilidad y seguridad den nos centro di ciudad cu instalacion di 100 palo di luz adicional nobo den nos centro di ciudad. E proyecto aki ta parti di e strategia holistico di revitalisacion di Oranjestad pa crea un ambiente mas sigur y atractivo pa tur su habitantenan, bishitantenan y empresarionan.
Follow NoticiaCla
