ORANJESTAD - Na 2017, e economia Arubano ta proyecta pa expande (den termino real) cu 3,4 porciento. Esaki lo sosode si, bou di e condicion cu e inversionnan relata na e renovacion di e refineria, parti den un periodo di 48 luna, lo cuminsa na juli 2017. Asina Banco Central di Aruba ta informa pa medio di un comunicado. Basa riba estimacionnan actual, e cantidad di turistanan cu lo bishita Aruba ta proyecta pa cay cu 1,9 porciento na 2017. Sinembargo, pa 2017 ta anticipa cu e ingreso turistico lo aumenta cu 1,3 porciento (den termino nominal).
Riba e frente internacional, e tendencia actual den proyeccionnan ta indica cu institutonan financiero a bira mas optimista pa cu e desaroyonan economico den e paisnan Europeo. E perspectiva riba ambos e crecemento di e producto domestico bruto (PDB) real y e porcentahe di desempleo ta mas faborabel compara cu seis luna anterior. E pronostico di prijsnan den e zona di Euro ta aumentando y ta proyecta pa yega 2 porciento, cual ta wordo considera como e tasa di inflacion desea.
E opinion general riba desaroyonan economico na Merca a keda practicamente sin cambio. Cambionan politico den e pais no tabata tin un impacto significante riba e proyeccionnan economico a corto plaso. E pronostico riba e crecemento di PDB y su componentenan na 2017 ta sigui stabil, mientras cu estimacionnan pa inflacion ta marginalmente mas halto y proyeccionnan di desempleo ta un poco mas abou.
E estimacionnan pa e economianan den Latino America ta generalmente mas pesimista compara cu e fin di e aña anterior. Ta proyecta e crecemento den PDB real pa baha for di 1,8 porciento te na 1,2 porciento na 2017 pa henter e continente. E causante principal ta Venezuela cu un bahada anticipa di 4,6 porciento, mientras cu ta premira cu Brazil tampoco lo resulta bon (+0,5 porciento). Ta anticipa cu Brazil lo recupera na 2018. Inflacion na Latino America probablemente lo ta entre 3 pa 5 porciento cu excepcionnan notabel di Venezuela y Argentina.
E economianan Caribense ta proyecta pa crece cu 3,1 porciento, impulsa pa un desaroyo firme na Republica Dominicana (+5,1 porciento). Di otro banda, Surinam y Trinidad y Tobago, probablemente lo mustra un resultado pober. Prijsnan di petroleo ta pronostica pa aumenta na un averahe di US$ 54 pa baril na 2017. Pa 2018, esakinan ta anticipa pa sigui crece, aunque levemente. Ademas, ta estima cu e prijs di oro lo alcansa un nivel un poco mas halto durante e periodo venidero.
ORANJESTAD – Diaranson mainta 27 di maart Prome Minister Evelyn Wever-Croes hunto cu colega Minister di Finansa Xiomara Maduro a biaha pa Corsou pa reunionan importante den cuadro di e tema di ENNIA.
MIAMI – E compania hotelero Four Seasons awor tambe ta sigui e trend di e compania Ritz-Carlton cu a inicia cu nan coleccion di yate luhoso estilo crucero. E compania a anuncia cu nan tambe ta drenta den e negoshi ey, di ‘espacio di crucero luhoso ultra chikito, cu su prome yate den construccion na Italia. E prome destinacionan ta conoci y ta pa Caribe, cuminsando na 2026. E temporada Caribense lo core di januari pa maart 2026 cu parada na St Barth, Nevis, the Grenadines, Saint Lucia, Barbados, Martinique, Curacao, Aruba y Guadeloupe. Cada bapor lo tin solamente 95 suites, cu ta 50% mas espacio pa persona cu cualkier otro crucero. Cada camber lo tin bentanan gigante di vloer te plafond, hopi vanidad den e bañonan y terras priva. Asina e presidente y CEO di Four Seasons Alejandro Reyna a sigura.
ORANJESTAD – CEO di Aruba Hotel & Tourism Association Tisa LaSorte, recientemente durante e programa Noticiacla LIVE a pidi pa hende na Aruba no bay protesta contra turista na Aruba riba e desaroyo di turismo. Den e video, e ta splica e peticion mas amplio.
ORANJESTAD - Association of Aruban Realtors (AAR) despues di un reunion cu AFTA a revoca su Commission Guidelines. E guidelinenan aki ta limita competencia den prijs entre intermedario, y esey a base di e Ordenanza encuanto Competencia (Mededingingsverordening; AB 2020 no. 103) ta prohibi desde 1 di januari 2024. A traves di e revocacion di e guidelinenan aki ta kita e limitacion pa competencia den prijs, loke por conduci na tarifa mas abao. Esey ta faborabel pa consumido y empresa cu ta haci uzo di servicio di intermediario. Pa motibo di e revocacion rapido di e guidelinenan di parti di AAR y e tempo corto desde cu e Ordenanza encuanto Competencia a drenta na vigor, AFTA a para su investigacion encuanto AAR y su miembronan.
ORANJESTAD – Entre e hotelnan existente y esnan nobo cu tin habri e aña aki ainda, mester tin 1500 trahado den aña 2024. Y esey ta pa hotel so. Asina e CEO y Presidente di AHATA Tisa LaSorte a bisa den e programa Noticiacla LIVE diahuebs anochi. Por wak e fragmento ey di e programa AKI.