ORANJESTAD – E detencion consehero y fotografo di minister Paul Croes, G. C. a keda prolonga cu 8 dia awe. Aworaki e ta den e asina yama ‘verlengde inverzekeringstelling’. Dus den su prome 10 dia’. Asina su abogado Chris Lejuez a confirma pa NoticiaCla diamars atardi. Pa loke ta e cargonan contra su cliente, Lejuez a splica cu e ta mescos cu e otronan cu ta deteni, esta cu su cliente tambe ta wordo sospecha di soborno y falsificacion den e caso Ibis.
DETENCION
Manera ta conoci caba, e Consehero a keda deteni ayera mainta, riba sospecho di labamento di placa y complicidad na soborno. Vocero di ministerio publico Ann Angela a confirma esaki pa e portal aki. E detencion ta den cuadro di e investigacion penal contra e mandatario den e caso di fraude y corupcion Ibis, y e prome cu ta directamente relaciona cu e oficina di e mandatario. Fuera di consehero, e ta encarga cu parti di e PR di e mandatario, y tambe ta miembro di e fundacion di e mandatario.
CASO TA SIGUI DILANTI
Esaki ta otro detencion, mientras cu e caso ta continua. E mandatario mes ta continua cu su bida, manera cu el a bisa den un conferencia di prensa recientemente. E fin di siman aki ainda e la campaña na Noord. Fuera di G.C. tin 2 persona mas cu ainda ta deteni den e caso aki. E caso a cuminsa fin di maart ora cu ministerio publico a anuncia cu e mandatario ta un sospechoso pa corupcion y fraude. A yama e caso Ibis. Tabatin varios persona cu a keda deteni, pero despues a recobra nan libertad. Un di e dos personanan deteni ainda, fuera di e consehero, ta tramitador di permiso. E otro no ta necesariamente un tramitador, pero si el a yuda pa tramita pa cierto compania so. E otro tabata un tramitador mas general.
ORANJESTAD – E caso riba proyecto Isla di Oro, cu a para ora cu a purba ‘wraak’ of destitui e huez en cuestion, ta continua fin di e luna aki, esta dia 29 di April proximo. Tabata dialuna cu corte a dicidi cu e peticion pa ‘wraak’ e huez, no ta valido y como tal e huez por continua trata e caso sin mas. For di informacion cu noticiacla a haya, ta mustra cu e caso lo no dura mucho largo mirando cu tabata practicamente na final di e tratamento, cu e peticion di ‘wraak’ e huez a keda solicita. E caso lo cuminsa pa 2’or y mei di atardi.
ORANJESTAD – Corte dialuna (tres huez) a dicidi cu e huez cu tabata trata e caso sumario entama pa Parke Arikock contra di proyecto na ex Isla di Oro, por keda trata e caso aki. Cu esaki e ta rechasa e peticion di parti di Gobierno di Aruba pa destitui y reemplasa e huez en cuestion di e caso en cuestion, A.vd L, di e caso, na Hulandes conoci cu e termino di ‘wraken’. Cu esaki, e caso por continua awor cu e huez en cuestion tratando esaki. E abogado di gobierno a demanda pa e huez en cuestion keda destitui di e caso, debi cu tabata parce cu e huez lo a mustra parcialidad pa cu e caso. Ora cu tin un situacion asina, e abogado por pidi pa kita e huez, osea ‘wraak’ e huez.
ORANJESTAD – Leynan y castigonan consecuente pa castiga matralto di animal (mascota) ta hopi deficiente. Asina abogado mr Lincoln “Dello” Gomez a constata e fin di siman aki. Segun e abogado, e ta referi na e caso di e cacho cu a conoce un maltrato cu a conduci na su morto finalmente. Cu esaki pueblo a pidi castigo pa e persona aki. Pero segun e abogado, e ta keda desapunta cu e leynan cu tin den un caso semejante. E abogado ta splica den e video.
ORANJESTAD – Manera cu Noticiacla.com a informa un dia prome, awe diabierna ex minister Guilfred Besaril a recobra su libertad, despues di tabata deteni pa 24 dia. Diahuebs e portal aki a informa cu Ministerio Publico no ta bay pidi pa prolonga e detencion di e ex minister, a lo menos cu Huez Comisario dicidi otro. Den e caso aki, e HC a opta pa bay cu OM, y a laga sr Besaril den libertad. Esey no kier men cu e ta liber di tur cargo, sino cu e no mester ta encarcela mas mientras cu e investigacion den e caso Tulipan ta sigui. E ta wordo acusa di entre otro malusa su funcion di minister, malversacion y estafa tempo cu e tabata den funcion na Hulanda como minister plenipotenciario durante e prome gabinete Wever Croes.
ORANJESTAD – Diabierna awor (8 di maart) ex minister Guilfred Besaril por recobra su libertad atrobe. Esaki despues di a sinta su dianan den pre aresto. Ministerio Publico diahuebs a confirma pa Noticiacla cu e periodo di 16 dia encarcelacion ta termina diabierna awor, y no tin intencion di pidi prolongacion.” OM no a pidi pa e sigui den detencion, dus una vez su termijn ta cla, hoogstwaarschijnlijk e lo bay den libertad” e vocero Ann Angela a sigui bisa. Esey no ta nifica cu e investigacion a termina. “ E investigacion ta sigui cana” Angela a sigui bisa. Ta solamente cu e termino stipula ta vence. Si e Huez Comisario sinembargo dicidi di prolonga esaki un biaha mas, e lo bira pa 60 dia. Pero mester bisa mesora, cu si esaki ta e caso mes, no ta nifica cu e ex mandatario tin cu keda sinta tur e 60 dianan.