ORANJESTAD - En conexion cu Aruba Summer Music Festival riba e dianan 30 di Juni y 1 di Juli 2017 cu lo tuma luga na APA Arena, Cuerpo Policial Aruba ta informa cu lo cera e caminda ey dilanti desde 5:00pm pa 4:00am.
Lo cera e caminda di L.G. Smith Boulevard pa trafico den ambos direccion cu excepcion di vehiculonan special manera Polis, Ambulance, Brandweer, Taxi y Busnan di transporte pa e evenemento y vehiculonan cu pas pa parkeer riba tereno di waf. Lo permiti pa pasa solamente via e crusada di Fatum (Guardian Group) direccion Bushiri y e personal di siguridad di e evenemento lo ta controlando.
Parti di e Turbo Rotonde tambe lo ta cera pa trafico. Lo desvia tur trafico circulando riba Turbo Rotonde via e caminda secundario cu ta direccion DA Drogisterij.
Lo cera e camindanan bou guia di e Departamento di Planologie di Cuerpo Policial Aruba for di 5:00pm te cu 4:00am y lo haci uzo di baricada y pilonnan na momento di cera. Prome cu final di evenemento lo dirigi tur trafico cu lo ta saliendo for de tereno di Waf na altura di Bushiri pa bay direccion pabou na e luznan di trafico na crusada di Fatum. Ta pidi automobilistanan pa tene bon cuenta cu e cambionan aki y desviacion tanto diabierna como diasabra, relaciona cu Aruba Summer Music Festival
ORANJESTAD – Aruba a conoce su di 5 morto di trafico diadomingo mainta. E melding na polis a bin pa 6’or segun vocero di polis Liliana Rasmijn. Segun Rasmijn, 6’05 central a haya informacion di un accidente cu a tuma lugar na altura di Motor World na Camacuri. E prome informacion tabata cu un auto a bolter riba e caminda y cu e victima ta pega bou di e auto. A pidi ambulance cu urgencia, pero na yegada di e ambulance, a mira cu no por haci mas pa e victima. Pa 7’10am, docter Texier a constata morto di e dama Reina Rosalinda Roga (33). Noticiacla y Cuerpo policial ta manda palabra di forza pa e famia di e fayecido.
PITTSBURGH - Pa mehora e habilidad riba e crimen cibernetico y fortalese e lasonan cu diferente departamentonan investigativo, commisario di polis Robert Candelario hunto cu diferente coleganan den region a forma parti di e congreso “ Disruption 2024” cu a tuma lugar na Pittsburgh Pennsylvania na Merca.
ORANJESTAD - Ayera durante oranan di merdia Wardacosta a bai cu un boto local na e punto di sosten di Wardacosta pa un control abordo. Durante di e control riba e boto dor di e agentenan di Wardacosta y e K-9 unit di Cuerpo Policial di Aruba, a bin encontra diferente pakete cu droga aden. En total a haya 237 kilo di droga di cual 57 kilo marihuana y 180 kilo cocaina. E droga y e dos hombernan, di cual unu local y unu Venezolano a keda entrega na Cuerpo Policial di Aruba.
ORANJESTAD – Diasabra atardi, Aruba a conoce su di 3 morto di trafico pa 2024. Segun informe oficial di polis, awe despues di 4’or atardi Central di Polis a dirigi patruya di Noord, ambulance y cu maximo urgencia pa un accidente pisa na altura di e supermercado NG y e restaurant Yen Yen situa na Kamay. Na yegada di e prome unidad a mira dos auto involucra den e accident. Un auto marca Nissan, modelo almera color shinishi numera A-24490 y un Honda, modelo CRV, color cora numera A-52927.
ORANJESTAD - Den ora nan di atardi, Centro Operacional Maritimo (MOC) di Wardacosta, a ricibi un mensahe pidiendo asistencia medico. Ta trata di un pasahero Aleman di 66 aña di edad riba un barco crucero, biniendo for di dirección nort di Aruba. Inmediatamente a tuma contacto cu doctor na warda di CITRO, cu a constata (despues di a evalua e situacion cu e team di medico riba barco) cu ta trata di un atake (stroke). Inmediatamente a manda e helicopter pa evacua e persona. Miembro nan di ambulance a ricibi e pasahero na Queen Beatrix International Airport i a hiba e turista hospital, pa ricibi tratamento medico.