Doño nobo no a wanta mucho cu Restaurant Amazonia

Doño nobo no a wanta mucho cu Restaurant Amazonia

Posted on 09/9/2014 3:58 pm AST | Updated on 09/9/2014 3:59 pm AST

ORANJESTAD – E sierre repentino di e restaurant popular Amazonia, a sorprende no solamente e trahadonan y clientenan fiel, pero tambe esnan den mundo culinario. “Nos no tabata sa cu e doño (nobo) tabata den problema” un fuente a divulga na NoticiaCla.com diamars mainta. NoticiaCla.com a compronde cu ora cu e doñonan anterior a bende e propiedad na april di e aña aki, no tabatin ningun indicacion cu e lugar lo a conoce un buelta di e estado aki.

De hecho, fuentenan fidedigno a mustra cu e doño nobo di e restaurant a cambia di concepto, y converti su mes mas den un concepto Hapones cu specialidad di e cuminda sushi. For di e mesun fuente, NoticiaCla.com a compronde cu e intencion di e donjo nobo (un persona local cu ta opera un negoshi di swimming pool tambe), tabata pa haci esaki den un tempo rapido y cuminsa opera den e forma nobo mas lihe cu ta posibel. Algo cu obviamente no a sosode y cu awor a conoce un cambio radical y drastico. Mas informacion cu NoticiaCla.com a logra compila y confirma ta cu ora cu e benta a tuma lugar, e doño nobo a haya un restaurant sin debe. Si algo a bay malo, esaki mester a sosode den e ultimo 6 lunanan despues cu e la cuminsa opera e propiedad, segun fuentenan a sigui informa.

Tabata dialuna cu e trahadonan a yega e restaurant y haya esaki sera. No tabatin ningun informacion inicial di e posibilidad aki y como tal e trahadonan aki a keda malamente sorprendi di e accion aki. Cierto medionan a raporta cu e propiedad aki a wordo bendi pa 1 florin, den forma simbolico, y un otro medio a simplemente raporta cu esaki a sera su portanan sin previo aviso. Sigur un sla duro pa e mundo culinario, mirando e exito den pasado di e localidad aki, su ubicacion, popularidad y tambe tipo di cuminda.

  • Powered by SETAR