ORANJESTAD - Informacionan cu e colegio di supervision financiero di Aruba a publica recientemente di e reacion riba publicacion di prome cuartal, ta cifranan cu nan a haya di e propio ministerio di finanza, exclusivamente. Asina e presidente saliente Age Bakker a sigura NoticiaCla recientemente durante un conferencia di prensa. Raiz di e pregunta di e portal aki, ta e hecho cu recientemente minister di finanza Angel Bermudez den un reaccion pa e portal aki a cuestiona e 'fuente' di informacion cu CAFT ta uzando pa su raportnan. Entre nan, e mandatario a cuestiona e hecho cu CAFT ta raporta 'un aumenta barbaro di personal di gobierno den 2017', y tambe cu 'CAFT gusta 'extrapola' cifranan di un cuartal riba henter e aña'. Bakker a bisa di tambe a mira e discusion aki y ta kere cu ta importante 'pa nos mantene nos mes na e hechosnan'.
HECHOS SEGUN BAKKER
Ora Bakker a papia di 'hechos', e ta referi na e propio presupuesto di gobierno cu ta haci mencion cu cobransa di loonbelasting lo aumenta cu 19% e aña aki. "E ta un aumento barbaro, debi na e 'compliance'. Nos ta mira cu den e prome cuartal e aumento ta apenas 6% y no 19%. Esey ta nifica cu den e proximo cuartalnan mester traha hopi duro pa yega e promedio di 19%" Bakker a cuminsa. A cuestiona Bakker riba esaki mustrando cu ta conciente cu gobierno ta bisa claramentee cu e cifra di 19% ta pa henter aña, y cu ta apenas 1 cuartal ta wordo raporta awor. Pues ta logico cu nunca e 19% menciona, por wordo logra den apenas un cuartal. Bakker riba esey a admiti e ora cu esey por ta berdad, pero cu experiencia ta mustra otro. Y cu ta netamente e experiencia ey ta mustra cu ta kere cu gobierno ta bay logra yega e cifra aki, y ta p'esey ta haci mencion di dje awor. Pa loke ta BBO tambe ta papia den presupuesto di aumento di 33%. Aki tambe Bakker ta mustra cu tin apenas 10% di aumento. "Leu di e cifra menciona. Those are the facts. Loke nos ta mira ta cu den e prome cuartal no ta wordo realisa cu loke ta wordo presupuesto pa henter e aña" Bakker a bisa. E ta menciona mesora si cu e ta spera cu den e proximo cuartal esaki mehora.
AUMENTO DI PERSONAL
Bakker a mustra pa loke ta e cifranan raporta riba datos di personal, cu e ta basa su mes exclusivamente riba cifra di ministerio di finanza. Aki Bakker ta mustra cu e ultimo 2 aña cada bes tin un caida leve di e cantidad di ambtenaar, y diripiente den e prome cuartal di 2017, tin un aumento barbaro di personal. "Esey kibra cu e tendencia y nos ta spera cu esaki no bira e tendencia nobo. Y como tal a haci mencion di esaki" Bakker a sigui bisa.
DEFENSA DI BAKKER
Segun Bakker sigui cu su defensa, ela menciona cu nan ta cana rond basta tempo den Caribe Hulandes y mientrastanto a acumula experiencia suficiente. Pues nan sa di kico nan ta papia. "Den hopi pais, ta wordo traha duro riba e compliance. Pero pa realmente logra cobra e impuesto, ta hopi trabou. Y e pregunta ta mirando cu nos ta casi caba den e di dos cuartal di e aña aki, si ta bay logra cumpli cu e loke a wordo poni" Bakker a bisa. Y comparando Aruba cu otro paisnan, e ta mustra cu no tin hopi pais rond mundo cu por realisa esaki. Pues bo por puntra di nos, si enberdad esaki ta wordo logra. E ta importante pa confiansa di e ciudadano Arubano, si (gobierno) ta bay logra cumpli cu e metanan poni". Mes momento Bakker ta bisa cu ta posibel pa logra ainda pa gobierno yega nan meta poni, pero e ta rekeri extra esfuerso. Cune, ta cuestiona si enberdad p.e. e refineria lo conoce su reapertura e aña aki ainda. Scucha e entrevista AKI.
ORANJESTAD – Siguiendo cu e trayecto di digitalisacion pa procesa declaracionnan y cobransanan di impuesto mas eficientemente, Departamento di Impuesto ta sumamento satisfecho di por anuncia cu e formulario di declaracion di winstbelasting awor ta wordo otorga den forma digital. Pues, entregamento di e declaracion ta sosode electronicamente. Esaki ta valido pa e declaracionnan desde aña fiscal 2023.
ORANJESTAD - Minister di Asuntonan Economico, Comunicacion y Desaroyo Sostenibel ta anuncia e prijsnan nobo di benta di combustibel entrante 8 mei 2024:
ORANJESTAD - A.T.A. ta sigui promove un turismo di mas balor pero cu menos impacto. Asina CEO di ATA, Ronella Croes a bisa durante e conferencia di prensa dialuna riba e cifranan annual 2023. Segun Croes,
ORANJESTAD - Merca ta sigui domina pero turismo di Latino America a crece mas aña pasa. Asina CEO di ATA Ronella Croes a bisa dialuna durante un conferencia di prensa riba cifranan di 2023. Segun Croes, Aruba a atrae un total de 1.243.554 bishitante na aña 2023, locual ta traduci den un recuperacion di 111% ora compar’e cu aña 2019. Aña pasa e mercado di Merca y Latino America crece mas. Merca por ehempel a crece cu 13% den cantidad di bishitante, mientras cu Latino America a subi cu 22%, den comparacion cu aña 2019. Europa, di otro banda, no a logra alcansa un crecemento, sino ainda ta den recuperacion. Compara cu aña 2019, a recupera cu 77%. Ta observa e mesun tendencia aki den otro islanan di Caribe tambe.
ORANJESTAD - Consumidornan tabata menos pesimista den e di segundo mita di 2023, mirando cu e indice di confiansa di consumidor a subi cu 1,5 punto di indice te na 94,1 den e di tercer trimester y cu 0,9 punto di indice te na 95,0 den e di cuater trimester di 2023 (Grafiek 1) .