- Kes the Band di Trinidad confirma pa Flip Flop Festival na juni!
- DVG: A cuminsa hospitalisa hende localmente infecta cu Dengue
- Minister na Merca ta lobby cu banconan pa fia 160 miyon dollar
- Hulanda dispuesto pa yuda paisnan den Caribe cu asunto di refugiadonan
- WEB Aruba ta firma acuerdo cu Seven Seas Water Group pa construi planta SWRO-3
AVB: Peticion di SV Dakota pa Arbitrage no ta permisibel
ORANJESTAD - Diasabra atardi directiva di Arubaanse Voetbal Bond (AVB) a trata e peticion pa “Arbitrage” cu SV Dakota a emiti. Pero net prome cu e reunion, SV Dakota a haci un otro peticion, pa si acaso nan no haya e arbitrage, pa manda e peticion pa Comision di Apelacion (CdA) pa un 'herziening', relaciona cu e decision tuma dia 21 juni ultimo. Esaki a base di 'nieuwe feiten'!
Manera ta conoci, diamars ultimo dia 20 di juni 2017 e comision di apelacion (Beroepscommissie) di Arubaanse Voetbal Bond (AVB) a reuni riba e protesta di Deportivo Nacional contra e decision di directiva di AVB, relaciona cu e ultimo wega hunga den liga “Division di Honor” entre SV Dakota y Deportivo Nacional. Despues di deliberacion interno, e comision a duna Deportivo Nacional rason den nan ponencianan y como tal e wega final pa e titulo di campeon lo mester ta entre SV RCA y Deportivo Nacional.
Locual a sosode ta cu, den 4 dia despues di entrega e decision final, e SV Dakota por apela atrobe. Ela solicita pa bay “Arbitrage” y si no por, e kier pa manda e decision bek pa “Beroepscommissie” di nobo pa bolbe trata e caso debi cu tin circunstancianan adicional, cu kisas no a tene na cuenta den nan decision na un principio.
E decision di directiva di AVB, tuma diasabra ultimo ta, cu den e protesta di SV Dakota, cu Arbitrage no ta al caso di acuerdo cu articulo 15 di statuut di AVB. Tin un “beroepscommissie” cu a atende esaki y e decision ta “bindend”! Ademas a confirma e ponencia aki caba den un sentencia di Hues for di aña 2004! Esta, cu mientras cu tin un comision di apelacion, no tin espacio pa arbitrage!
Na di dos luga, e peticion pa revisa e decision di CdA riba peticion di SV Dakota, a wordo manda diasabra anochi mes pa CdA pa nan analisa y tuma un decision di acuerdo cu nan evaluacion. Ta keda na “Beroepscommissie” awor si nan ta consider’e of no. Te aki e trabou di AVB a yega!
Directiva di Arubaanse Voetbal Bond no sa ainda con lihe e CdA lo reuni pa por tuma un decision riba e peticion di SV Dakota, pero como cu diamars caba tin programa e prome wega di final entre SV RCA y Deportivo Nacional, ta evaluando awor pa pospone e wega pa duna e comision un oportunidad pa por analisa e peticion di SV Dakota. Un ke otro tin di haber cu mester duna ekiponan oportunidad pa por sigui train y prepara pa e tres weganan final pa dicidi ken lo bira campeon di e liga di Division di Honor di Arubaanse Voetbal Bond.
Ainda directiva di AVB lo mester trata e proposicion aki, esta pa move e prome wega pa por ehempel diahuebs en bes di diamars y e di dos wega pa diamars en bes di diasabra awor caba. Atrobe, esakinan ta idea cu ainda mester pasa directiva di AVB pa consideracion, dependiendo posicion di e Comision di Apelacion, cu ta un organo independiente.
Rafael Nadal: Mi ta considera esaki como mi ultimo aña (hungando tennis professional)
BARCELONA – E strea internacional di tennis professional Rafael Nadal a anuncia cu esaki ta su ultimo aña professional. “ Mi ta considera esaki como mi ultimo aña y mi kier disfruta di cada momento” Nadal a bisa dialuna durante un conferencia di prensa na Barcelona. E la anuncia su participacion diamars awor na e torneo ATP na Barcelona. Ta su prome participacion despues di a retira tres luna pasa di e torneo na Australia. E ganador di 22 titulo grandslam, a dicidi ultimo momento pa participa e siman aki. E tenista di 37 aña di edad mester a sacrifica varios torneo debi na su condicion fisico cu no tabata optimal. Ultimo tempo e ta sufriendo di basta lesion y a indica aña pasa caba cu esaki por ta su ultio aña. Awe e la confirma cu esaki enberdad ta su ultimo aña hungando tennis professional.
Cantidad record di persona ta den Ronde van Aruba awe
SAVANETA – Un cantidad record di persona ta den Ronde van Aruba (RVA) awe. Segun informacion di e portal 297Sports, un total di 726 coredor ta subi caminda, cual por cierto ta un record. Tur e lunanan di preparacion lo keda demostra awe riba caminda unda e demas participantenan lo duna un show di coremento riba e careteranan di nos dushi isla di Aruba. Lo tin un total di 16 coredor single e aña aki, 57 duo teams cual ta e cantidad mas grandi den historia di RVA. Por ultimo e 149 estafette lo ta den e gruponan di 4 relay, pues 596 persona lo core e 72km rond di nos isla. E fiebre di Ronde van Aruba ya a wordo sinti y lo bay ta grandi awe full rond di nos isla cu hopi mirones canto di caminda. Tin varios happening prepara na e diferente post.
Seleccion cu a conkista 54 medaya den Carifta Aquatics Championship 2024 a bolbe Aruba
ORANJESTAD - Diabierna atardi den un esfera ameno, Minister Endy Croes a ricibi nos Seleccion di Landamento y Seleccion di Landamento Artistico den e VIP room di Aeropuerto Internacional Reina Beatrix. Manera ta conoci, siman pasa nos atletanan a competi den Carifta Aquatics Championships 2024 cu a tuma luga na Nassau, Bahamas y Fort Lauderdale, Florida. Carifta ta e competencia di e mihonan di Caribe. E aña aki alrededor di 400 atleta di 21 pais a participa. Famia y amistad tabata ansioso sperando e yegada di nos atletanan. E hobennan a conkista un total di 54 medaya den dos diferente disciplina acuatico: landamento y landamento artistico. Den e disciplina di landamento a logra 30 medaya y landamento artistico 24 medaya. Pais Aruba a keda na di 7 luga den 21 pais. Den nomber di Gobierno di Aruba, Minister Endy Croes a felicita e atletanan cu nan excelente prestacion den Carifta. Alabes, a gradici e atletanan pa carga nomber di Aruba y laga nos pais briya riba plataforma internacional.
Cantidad di hungadornan internacional den baseball Major League na Merca a baha
NEW YORK — E percentahe di hungadornan internacional hungando baseball professional na Merca, a baha te na 27.8% cu ta e nivel di mas abou desde 2016. Aworaki tin 264 hungador di 19 pais, entre e 949 hungadornan activo total ora cu e temporada 2024 a habri siman pasa. E pais internacional cu tin mas hungador na Merca, ta Republica Dominicano cu 108 hungador, sigui pa Venezuela cu 58 sigui pa Cuba cu 18. Corsou tin 4 mientras cu Aruba tin 1 (oficialmente) cu ta Xander Bogaerts. Actualmente e tin un hungador riba ‘standby’ cu Atlanta Braves, esta Chadwick Tromp. Pa loke ta e ekipo cu tin mas hungador internacional, Houston Astros ta lidera e grupo aki cu 16 hungador, sigui pa San Diego cu 15, Boston cu 14, Miami cu 14 y Cleveland cu 12.
Arjan van der Laan ta bira entrenador di seleccion di futbol damas di Aruba
ORANJESTAD – E conocido entrenador Hulandes Arjan van der Laan ta bira e entrenador nobo di ARuba pa e seleccion di futbol damas di Aruba. E ta reemplasa Veron Albertz. Van der Laan tabata entrenador di e seleccion nacional di futbol di damas Hulanda.
Na caminda pa Aruba International Regatta 2024
ORANJESTAD - Aruba International Regatta lo tuma luga riba diabierna 28 di juni te cu 30 di juni na Surfside Beach. Un evento cu sigur hopi amante di lama y di nabegacion ta anticipa, sigui pa dos dia di careda riba diasabra 29 di juni cual lo bira e prome dia, y diadomingo 30 di juni e di dos dia di careda.
Follow NoticiaCla
